काठमाडौं, ४ असोज। काठमाडौं महानगरपालिका–१९ क्षेत्रपाटीमा पार्किङ गरी राखेको बा. १७ च ६४२७ नम्बर गाडीबाट गत भदौ १९ गते ८८ के.जी. सुन बरामद भएको घटनामा संलग्न थप ५ जनालाई असोज २ गते सोमबार पक्राउ गरिएको प्रहरीले जनाएको छ ।
दार्चुला काँटे गाउँपालिका–३ घर भई काठमाडौं न्यूरोडस्थित रन्जना कम्प्लेक्समा कार्यविनायक सुनचाँदी गहना पसल संचालन गरी बस्ने ४२ वर्षीय गणेशदत्त बडुलाई १० लाख ८२ हजार रुपैयाँ, भारतीय रुपैयाँ ८ हजार, अमेरिकन डलर १ हजार १ सय, काठमाडौं महानगरपालिका–२५ वाङ्गेमुढास्थित घरमा शाक्य सुनचाँदी पसल संचालन गरी बस्ने ५९ वर्षीय शुभरत्न शाक्यलाई १ करोड ४२ लाख नगद र १ के.जी. २०९ ग्राम सुन साथै चाँदीको सिक्का २ हजार ४ सय ७८ ग्राम सहित र भारत विहार मधुवनी जिल्ला जयनगर थाना घर भई काठमाडौं नरदेवीमा रविश्या ट्रेडर्स संचालन गरी बस्ने ५९ वर्षीय सत्यनारायण अग्रवाललाई नेपाली १३ लाख ५० हजार रुपैयाँ सहित पक्राउ गरिएको हो ।
यसैगरी भारत महाराष्ट्र साङली जिल्ला, आठपाडी थाना घर भई हाल काठमाडौं ओटुमा पशुपति सुन चाँदी खार्नी पसल संचालन गरी बस्ने ३८ वर्षीय नन्दकुमार मर्गले र सोही ठाउँ घर भई काठमाडौं ओटुमा सिद्धनाथ सुनचाँदी खार्नी पसल संचालन गरी बस्ने ५८ वर्षीय उल्लास दिनकर सालुखे समेत पक्राउ परेका छन् । यस सम्बन्धमा प्रहरीले थप अनुसन्धान गरिरहेको पनि खबर छ ।
