काठमाडौं । अफगानिस्तानको चरमपन्थी तालिवानले विजयी भएको घोषणा गरेको छ । अफगानिस्तानका एकपछि अर्को राज्य कब्जा गर्दै काबुल पसेर राष्ट्रपति कार्यालयमा नियन्त्रण जमाएको तालिवानले विजयी भएको घोषणा गरेको हो ।
तालिवानका एक प्रवक्ताले अलजजिरासँग कुराकानी गर्दै आफूहरूको जित भएको र अफगानिस्तानको युद्ध सकिएको जनाएका छन् ।
‘हामीले हाम्रो देशको मुक्ति र जनताको स्वतन्त्रता चाहेका थियौं । त्यो प्राप्त गरेका छौं,’ तालिवानी प्रवक्ताले भनेका छन् ।
विदेशी शक्तिहरूले असफलताबाट पाठ सिकेर उस्तै गल्ती दोहोर्याउने साहस नगर्ने उनले बताएका छन् ।
अफगानिस्तानमा रसियादेखि अमेरिकासम्मका राष्ट्र सहभागी हुँदा कुनैले पनि युद्ध जित्न सकेनन् ।
तालिवानले विजयी घोषणा गर्नुअघि नै त्यहाँका राष्ट्रपति असरफ घानीले देश छाडेका थिए । उनी छिमेकी मुलुक उज्बेकिस्तानतर्फ लागेको बताइएको छ ।
योसँगै त्यहाँको सरकार पनि ढलेको छ ।
२० वर्षपछि तालिवानले काबुलमा नियन्त्रण जमाएपछि सर्वसाधारण त्रसित बनेका छन् ।
