चितवन, १३ माघ : नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले सरकार गठनभन्दा पहिला पार्टी एकता टुङ्ग्याउने क्रममा आफूहरु रहेको बताएका छन् ।
प्रेस सेन्टर चितवनले माघ १३ गते यहाँ आयोजना गरेको पत्रकार सम्मेलनमा उनले सरकार त गठन हुन्छ नै पार्टी एकता त्योभन्दा अगाडि नै होस् भन्ने आफ्नो चाहना छ भने ।
प्रचण्डले भने –“मेरो कोशिस भन्नुहुन्छ भने त सरकार गठनभन्दा अघि नै पार्टी एकता हुनु जनभावना अनुसार पनि हुन्छ । हामीले गरेको प्रतिबद्धता अनुसार पनि हुन्छ ।” आज भोलिनै एउटा निष्कर्षमा पुग्ने तयारीमा रहेको पनि उनले बताए । उनले फागुनको दोस्रो हप्ताभित्र सरकार गठन हुने बताए ।
देशको राजनीतिक स्थायित्व हुन र विकासलाई गति दिनका लागि पनि कम्युनिष्टको एउटा बलियो केन्द्र आवश्यक रहेको अध्यक्ष प्रचण्डले विचार व्यक्त गरेका छन्। अहिलेको काम चलाउ सरकारले गम्भीर प्रकृतिका निर्णय गर्ने गल्ती गरेको उनले बताए ।
प्रचण्डले अहिलेको निर्णयबाट नेपाली काँग्रेसको लोकतान्त्रिक चरित्रमाथि नै प्रश्न चिन्ह खडा भएको धारणा राखेका छन् ।
प्रचण्डले भने–“यसले नेपाली काँग्रेसलाई दीर्घकालीन असर गर्छ भन्ने कुरा साँचो हो ।” सरकारको यो निर्णयप्रति एमाले र माओवादीको मत एउटै रहेको छ।''
माडीको बाँदरमुढे घटनामा मृत्यु भएकालाई शहीद घोषणा गरिएको विषयमा टिप्पणी गर्दै प्रचण्डले ''जसको नेतृत्वमा सरकार भयो त्यसले आफूखुसी शहीद घोषणा गर्ने प्रक्रिया राम्रो नभएको'' बताए ।
अध्यक्ष दाहालले भने “त्यसको एउटा मापदण्ड बनाएर त्योभित्र रहेर मात्रै शहीद घोषणा गर्नु राम्रो हुन्छ ।” यद्यपि प्रचण्डले शहीद घोषणा गरेकोमा आफ्नो कुनै आपत्ति भने नभएको पनि बताए ।
मधेशवादी दल पनि अब बन्ने वाम गठबन्धनको सरकारमा सहभागी हुने प्रचण्डले विश्वास व्यक्त गरे । मधेसवादी दलहरुले उठाएको संविधान संशोधनको विषयमा पनि समझदारी बन्ने सम्भावना रहेको उनले आँैल्याएका थिए । रासस
–––
2023-12-18-09-12-30-800x533.jpeg)
