भद्रपुर (झापा), १२ वैशाखः मेची रङ्गशालामा जारी प्रथम ‘ओम साई पाथिभरा चन्द्रगढी महिला गोल्डकप’ फुटबल प्रतियोगिताअन्तर्गत आज भएको दोस्रो सेमिफाइनल खेलमा सशस्त्र प्रहरीको एपिएफ क्लब विजयी हुँदै फाइनलमा प्रवेश गरेको छ ।
एपिएफले चर्च ब्वाइज युनाइटेडलाई ३–० गोल अन्तरले पराजित गर्दै उपाधिनजिक पुगेको हो । आगामी सोमबार हुने फाइनल खेलमा एपिएफले त्रिभुवन आर्मी क्लबसँग प्रतिस्पर्धा गर्नेछ । खेलको ३४औँ मिनेटमा रश्मीकुमारी घिसिङले गोल गर्दै एपिएफलाई अग्रता दिलाइन् । कुसुम खतिवडाको क्रस पास अनिता बस्नेत हुँदै आएको बललाई घिसिङले जाली चुमाएकी थिइन् ।
पहिलो हाफमा १–० ले अगाडि रहेको एपिएफले दोस्रो हाफमा थप दुई गोल ग¥र्यो । ४९औँ मिनेटमा कप्तान अनिता बस्नेतले गोल गर्दै अग्रता दोब्बर पारिन् । रश्मीकुमारी घिसिङको पासमा बस्नेतले गोल गरेकी थिइन् ।
बैसट्ठीऔँ मिनेटमा रश्मीकुमारी घिसिङले व्यक्तिगत दोस्रो गोल गर्दै एपिएफको जित सुनिश्चित गरिन् । खेलभरि एपिएफले आक्रामक खेल प्रस्तुत गर्दा चर्च ब्वाइजले रक्षात्मक रणनीति अपनाएको थियो । खेलको ‘प्लेयर अफ द म्याच’ एपिएफकी रेनुका नगरकोटी घोषित भइन् । उनले नगद रु ११ हजार पुरस्कार प्राप्त गरिन् ।
प्रतियोगिताको विजेताले रु ११ लाख तथा उपविजेताले रु पाँच लाख पुरस्कार प्राप्त गर्नेछन् । साथै, सर्वोत्कृष्ट खेलाडीलाई नगद रु एक लाख तथा उत्कृष्ट गोलकिपर, डिफेन्डर, मिडफिल्डर, फरवार्ड र प्रशिक्षकलाई जनही रु २५ हजार प्रदान गरिने आयोजकले जनाएको छ ।
