आज वास्तु दिवस एवं विश्वकर्मा पूजा, कलकारखानालाई विशेष रूपमा सजाएर मनाइँदै

काठमाडौँ, १ असोज । प्रत्येक वर्ष कन्या अर्थात् आश्विन सङ्क्रान्तिका दिन आज कालीगढहरूले विश्वकर्माको पूजा आराधना गरी वास्तु दिवस एवं विश्वकर्मा पूजा पर्व मनाउँदैछन् ।
 

विभिन्न कलकारखानामा विश्वकर्मा भगवान्को बालुवाको मूर्ति वा तस्वीरमा विधिपूर्वक पूजा आराधना गरी यो दिवस मनाउने गरिन्छ । कलकारखानालाई विशेष रूपमा सजाएर मजदुरलाई समेत सहभागी गराएर यो दिवस मनाइन्छ ।

मोरङको सुन्दरहरैँचा नगरपालिका–७ स्थित गोठगाउँ बजारमा विश्वकर्मा पूजाको लागि चाहिने सामग्रीहरू बिक्रीका लागि थापिएको अस्थायी पसल । तस्बिर: मणिराम दाहाल/रासस
 

बालुवा अन्य चीजबाट बनाइएको विश्वकर्माको मूर्ति वाग्मती मुहानस्थल सुन्दरीजल वा अन्य शुद्ध स्थलमा लगी सेलाउने गरिन्छ । आज पूजा गरी मङ्गलबारदेखि नदीमा लगी मूर्ति सेलाइन्छ ।

धनुषाको क्षिरेश्वरनाथ नगरपालिका महेन्द्रनगर बजारमा विश्वकर्मा पूजाको लागि चाहिने  सामग्रीहरू बिक्रीका लागि थापिएको अस्थायी पसल । तस्बिर: अजयकुमार साह/रासस
 

आजका दिन कालीगढले उपयोगमा ल्याउने विभिन्न औजारका सामानमा पूजा आराधना गरेमा धेरै समय टिक्ने, कामका बेलामा नबिग्रने र राम्रो काम गर्न सकिने लगायत गुण प्राप्त हुने धार्मिक विश्वास छ ।

  
द्वापर युगमा भगवान् कृष्णलाई राक्षसहरूले दुःख दिएपछि विश्वकर्माले समुद्रको बीचमा ‘भेद द्वारका’ बनाइ लुकाएको धार्मिक विश्वास छ । 
–––