काठमाडौं । बिहीबार भएको राष्ट्रियसभा उप–निर्वाचनमा खिमलाल देवकोटासँग पराजित एमालेका नेता एवं निवर्तमान गृहमन्त्री रामबहादुर थापाले आफूलाई मतदान गर्ने मतदातालाई धन्यवाद ज्ञापन गरेका छन् ।
मत परिणाम घोषणाको केही समयपछि सामाजिक सञ्जालमार्फत थापाले वाग्मती प्रदेशसभाका सांसद, महानगरपालिका, उपमहानगरपालिका, नगरपालिकाका मेयर उपमेयर तथा गाउँपालिकाका अध्यक्ष र उपाध्यक्षलाई धन्यवाद ज्ञापन गरेका हुन् ।
आफूलाई पछि पार्दै राष्ट्रियसभा सदस्यमा निर्वाचित खिमलाल देवकोटालाई पनि उनले बधाई ज्ञापन गरेका छन् ।
यसअघि माओवादी केन्द्रका तर्फबाट राष्ट्रियसभामा निर्वाचित थापा एमाले प्रवेश गरेसँगै उनलाई सो पार्टीले सांसदसँगै साधारण सदस्यबाट समेत निष्कासन गरेको थियो । उक्त रिक्त पदमा बिहीबार एमालेले बादललाई नै उम्मेदवार बनाए पनि उनले जित निकाल्न सकेनन् । प्रतिस्पर्धी खिमलालले ५०८८ मत ल्याउँदा बादल मात्रै ४०१४ मतमा सीमित भए ।
