काठमाडौं । राष्ट्रिय महिला लिग फुटबलअन्तर्गत आइतबार भएको खेलमा सावित्रा भण्डारीको चार गोलको मद्दतमा विभागीय टोली सशस्त्र प्रहरी बलको एपीएफ क्लब विजयी भएको छ ।
एपीएफ क्लबले विराटनगर महानगरपालिकालाई ७–० गोलअन्तरले पराजित गरेको हो । एपीएफ क्लबको यो लगातार दोस्रो जित हो ।
सातदोबाटोस्थित एन्फा कम्प्लेक्सको मैदानमा भएको खेलमा एपिएफले मध्यान्तरअघि नै ४–० गोलको अग्रता बनाएको थियो । मध्यान्तरपछिको खेलमा एपीएफले थप तीन गोल गर्यो । खेलको नवौँ मिनेटमा एपीएफकी अनीता केसीले पहिलो गोल गरिन् । खेलमा चम्किएका सावित्रा भण्डारीले भने खेलको २५ औं मिनेमा आफ्नो गोलको खाता खोलिन् । त्यसपछि उनले ४२ औँ, ७४ औँ र ८९ औँ मिनेटमा गोल गर्दै ४ गोलको योगदान दिइन् ।
यस्तै, अनिता केसीले खेलको ३५ औँ मिनेटमा व्यक्तिगत दोस्रो गोल गरिन् । एपीएफकी सरु लिम्बूले खेलको ७२ औँ मिनेटमा गोल गरिन् । खेलको प्लेयर अफ दी म्याच सरु लिम्बु घोषित भइन् । एपिएफले पहिलो खेलमा रौतहटको चन्द्रपुर नगरपालिकालाई ६–० गोलअन्तरले हराएको थियो ।
विराटनगरले भने पहिलो खेलमा स्याङ्जाको वालिङ नगरपालिकासँग एक एक गोलको बराबरी खेलेको थियो । महिला लिग फुटबलअन्तर्गत आज उदयपुरको चौदण्डीगढी नगरपालिका तथा रौतहटको चन्द्रपुर नगरपालिकाबीच हुने अखिल नेपाल फुटबल सङ्घ (एन्फा) ले जनाएको छ ।
