भद्रपुर (झापा), १२ वैशाखः मेची रङ्गशालामा जारी प्रथम ‘ओम साई पाथिभरा हस्पिटल चन्द्रगढी महिला गोल्डकप’ फुटबल प्रतियोगिताअन्तर्गत वैशाख ११ गते भएको पहिलो सेमिफाइनल खेलमा त्रिभुवन आर्मी क्लब विजयी हुँदै फाइनलमा प्रवेश गरेको छ । आर्मीले नेपाल पुलिस क्लबलाई २–१ गोल अन्तरले पराजित गर्दै उपाधिनजिक पुगेको हो ।
फाइनल प्रवेशसँगै आर्मीले कम्तीमा रु पाँच लाख पुरस्कार सुनिश्चित गरेको छ । अब आर्मीले वैशाख १२ गते शनिबार हुने सशस्त्र प्रहरीको एपीएफ एफसी र चर्च ब्वाइज युनाइटेडबीचको विजेतासँग उपाधिका लागि प्रतिस्पर्धा गर्नेछ ।
खेलको ३२औँ मिनेटमा चन्द्रा भण्डारीले गोल गर्दै आर्मीलाई अग्रता दिलाइन् । पुलिसकी डिफेन्डर समिक्षा घिमिरेको त्रुटिको फाइदा उठाउँदै भण्डारीले गोल गर्न सफल भइन् ।
छपन्नऔँ मिनेटमा जेनिफर राना मगरले गोल गर्दै आर्मीको अग्रता दोब्बर पारिन् । पुलिसले खेलको ७०औँ मिनेटमा एक गोल फर्कायो । पुजा रानाको हेडमार्फत दिएको पासलाई रेखा पौडेलले पुनःहेड गर्दै गोलमा परिणत गरिन् ।
बाँकी समयमा पुलिसले बराबरीको प्रयास गरे पनि आर्मीका डिफेन्डर बिमला बिक, सुनिता चौधरी र अनिता लम्जेलले उत्कृष्ट प्रदर्शन गर्दै थप गोल हुन दिएनन् ।
खेलको ‘प्लेयर अफ द म्याच’ आर्मीकी डिफेन्डर बिमला बिक घोषित भइन् । उनले नगद रु ११ हजार पुरस्कार प्राप्त गरिन् ।
प्रतियोगिता अन्तर्गत २०८३ वैशाख १२ गते शनिबार सशस्त्र प्रहरीको एपीएफ एफसी र चर्च ब्वाइज युनाइटेडबीच दोस्रो सेमिफाइनल खेल हुने आयोजकले जनाएको छ ।
प्रतियोगिताको विजेताले रु ११ लाख तथा उपविजेताले रु पाँच लाख पुरस्कार प्राप्त गर्नेछन् । साथै, सर्वोत्कृष्ट खेलाडीलाई नगद रु एक लाख तथा उत्कृष्ट गोलकिपर, डिफेन्डर, मिडफिल्डर, फरवार्ड र प्रशिक्षकलाई जनही रु २५ हजार प्रदान गरिनेछ ।
