काठमाडौं । नेपाली सेनाले आफ्नो संस्था र नेतृत्वलाई जोडेर विभिन्न सञ्चारमाध्यम तथा सामाजिक सञ्जालमा प्रसारण भइरहेका तथ्यहीन सूचना, टिप्पणी र अभिव्यक्तिप्रति गम्भीर ध्यानाकर्षण भएको जनाएको छ ।
२०८३ वैशाख ११ गते १६ः१० बजे जंगी अड्डास्थित जनसम्पर्क तथा सूचना निर्देशनालयबाट जारी प्रेस नोटमार्फत सेनाले कपोलकल्पित र भ्रम सिर्जना गर्ने सामग्री प्रसारण नगर्न/नगराउन स्पष्ट अपिल गरेको हो ।
सेनाले यस्ता आधारहीन सामग्रीले आम नागरिकमा भ्रम फैलाउने भन्दै त्यसप्रति सचेत रहन आग्रह गरेको छ । प्रेस नोटमा नेपाली सेना र सम्बन्धित निकायहरूले यस्ता उच्छृङ्खल तथा अराजक गतिविधिको नियमित निगरानी गरिरहेको उल्लेख गर्दै यस्तो कार्यमा संलग्न व्यक्तिहरू प्रचलित कानुनको दायरामा रहने चेतावनीसमेत दिइएको छ ।
सेनाले आम जनमानसलाई आधारहीन र द्वेषपूर्ण समाचार तथा टीका–टिप्पणीमा विश्वास नगर्न पनि आग्रह गरेको छ । आधिकारिक सूचनाका लागि नेपाली सेनाबाट जारी हुने प्रेस विज्ञप्ति, आधिकारिक सामाजिक सञ्जाल, वेबसाइट तथा जनसम्पर्क तथा सूचना निर्देशनालयसँग समन्वय गर्न अनुरोध गरिएको छ ।
यो अपिलले पछिल्लो समय सेना र सैनिक नेतृत्वलाई लक्षित गर्दै फैलाइएका सूचनामाथि जंगी अड्डा संवेदनशील बनेको संकेत गरेको छ । प्रेस नोटको भाषा हेर्दा सेना केवल खण्डनमा सीमित छैन, गलत सूचना फैलाउनेहरूलाई कानुनी दायरामा ल्याउने चेतावनीसहित अघि बढेको देखिन्छ ।
