काठमाडौं । सरकारले हरेक वर्ष विनियोजन गर्दै आएको पुँजीगत बजेट लक्ष्यअनुसार खर्च हुन सकेको छैन । समयमै खर्च नहुने र आर्थिक वर्षको अन्तिम समय अर्थात् असार मसान्तमा हतारहतार खर्च गर्ने प्रवृत्ति पुरानै मानिन्छ । चालु आर्थिक वर्षको यस अवधिसम्मको परिणामले पनि त्यही संकेत गरेको छ ।
चालु आर्थिक वर्षको ९ महिनाको अवधिमा सरकारको पुँजीगत खर्च २३ प्रतिशत मात्रै भएको महालेखा नियन्त्रक कार्यालयले जनाएको छ । चालु आवमा सरकारले पुँजीगत शीर्षकमा ४ खर्ब ७ अर्ब ८८ करोड ८० लाख रुपैयाँ बजेट विनियोजन गरेको थियो । तर, कार्यालयको तथ्यांकअनुसार चालु आवको साउनदेखि चैत मसान्तसम्म ९६ अर्ब १९ करोड ५१ लाख रुपैयाँ मात्र खर्च भएको छ । यो रकम कुल लक्ष्यको जम्मा २३.५८ प्रतिशत रहेको बताइएको छ ।
गत आवको सोही अवधिको तुलनामा पनि यस वर्ष पुँजीगत खर्च न्यून देखिएको कार्यालयको दाबी छ । अघिल्लो आर्थिक वर्ष २०८१/८२ को सोही अवधिमा ३२.२४ प्रतिशत पुँजीगत खर्च भएको थियो । उता, सरकारको चालु खर्च भने ६३ प्रतिशत नाघेको कार्यालयले जनाएको छ ।
चालु आवको चैत मसान्तसम्म सरकारले चालु खर्चतर्फ ७ खर्ब ४७ अर्ब ५२ करोड ४४ लाख रुपैयाँ खर्च गरिसकेको छ । यो विनियोजनको ६३.३ प्रतिशत हो । चैत मसान्तसम्म सरकारले ८ खर्ब ८६ अर्ब २८ करोड ३६ लाख रुपैयाँ राजस्व संकलन गरेको छ । चालु आवमा राजस्व संकलनतर्फ सरकारले कुल १४ खर्ब ८० अर्ब रुपैयाँ उठाउने लक्ष्य लिएको थियो ।
यस अवधिमा राजस्व संकलनतर्फ भने सरकारले वार्षिक लक्ष्यको झन्डै ६० प्रतिशत प्रगति हासिल गरेको छ । कुल बजेट खर्चतर्फ सरकारले हालसम्म १० खर्ब ५९ अर्ब ९५ करोड ७२ लाख रुपैयाँ खर्च गरेको छ । यो ५३.९७ प्रतिशत रहेको महालेखा नियन्त्रक कार्यालयको तथ्यांकमा उल्लेख छ ।
