काठमाडौं । उपेन्द्र यादव नेतृत्वको जनता समाजवादी पार्टी (जसपा) नेपाल पार्टी पनि भद्रगोल हुन थालेको छ । जसपाको महाधिवेशन टुंगिएको एक महिनाभन्दा धेरै समय हुँदा पनि पार्टी पदाधिकारी चयन हुन सकेको छैन । पार्टी विभाजनको मार खेपेका उपेन्द्रले पछिल्ला दिनमा एमाले अध्यक्ष केपी ओली(केपी बा)सँग सम्बन्ध विस्तार गरेर अचेल पार्टी जोगाउने र सत्ताको सहयोग पनि लिन खोजेका छन् ।
सत्ताको सहयोग लिन खोजेकै कारण पार्टी विभाजन पनि रोकाउन सकिने उपायको खोजी गर्न थालेका छन् । पछिल्ला दिनमा उपेन्द्र यादवले प्रधानमन्त्रीको बेलादेखि नै प्रचण्डसँग सम्बन्ध टाढा राखेर ओलीसँग सुधार गरेका हुन् । पार्टी भद्रगोल भएका बेलामा किन यादवले ओलीको साथ लिन खोजेका छन् ? भन्ने चाहिं चर्चाको विषय बनेको छ । उपेन्द्र यादवबाट फुटेर अशोक राईले नयाँ पार्टी बनाएका छन् । उनीहरुको पार्टीलाई सर्वोच्च अदालतले वैधानिकता भने दिइसकेको छैन ।
अदालतको आदेशले उनीहरुको राजनीतिक भविष्य निर्धारण गर्नेछ । पार्टी नयाँ बनेको अवस्थामा उनीहरु एमालेमा मर्ज हुने अनुमान पनि भइरहेको छ । राईहरुको समूहमात्र होइन् , जसपा नेपालका नेता राजकिशोर यादवको समूह पनि असन्तुष्ट रहेको छ । खासमा यादव नै पार्टी फुटाउन चाहन्थे तर राईले पत्तो दिएनन् भन्ने पनि चर्चाको विषय रहेको छ । पछिल्ला दिनमा पनि राजकिशोर यादव पार्टी फुटाउने सोचमा रहेको चर्चा छ ।
केही सांसदहरुलाई साथ लिएर उनले परिस्थिति बनाउन खोजेको र एमाले अध्यक्ष तथा प्रधानमन्त्री केपी ओलीसँग निरन्तर छलफलमा रहेको पनि बताइन्छ । जसपाबाट विभाजित समूह र असन्तुष्ट पक्ष पनि ओलीसँग छलफल र निकट भएर जान थालेपछि उपेन्द्र यादव आफै ओलीसँग निकट भएको चर्चा हुन थालेको छ । विगतमा ओलीसँग खासै सम्बन्ध नभएको र दूरी कायम राख्ने गरेका थिए । तर, विगत २÷३ महिना यता चाहिँ उपेन्द्रले ओलीसँग सम्बन्ध सुधार गरेर पार्टी बचाउने रणनीति लिएको पनि बताइन्छ । (साँघु साप्ताहिक, २०८१ साउन १४)
2025-08-18-07-08-30-800x533.jpeg)
