साउन १६, जापान । जापानमा बसोबास गर्दै आइरहेको रुकुमेलीहरुको संस्था रुकुमेली समाज जापानले पश्चिम रुकुमको सानीभेरी गाउँपालिका वडा. नम्बर ३ गरायलाका मृगौला पिडित गंगालाल नकाललाई आर्थिक सहयोग संकलन गरेको छ । संस्थाका बरिष्ठ उपाध्यक्ष प्रिन्स पुन मगर ,महासचिव लोकेन्द्र बाँठा मगर र कोषाध्यक्ष प्रशान्त ओलीको संयोजकत्वमा ४१ हजार रकम संकलन गरिएको हो ।
पिडितको आर्थिक स्थिति पनि कमजोर रहेको र आफैले उपचार खर्च जुटाउन नसके पछि एबिसी टेलिभिजनबाट प्रशारण हुने इन्द्रेणी कार्यक्रममा गंगालाल नकालको बिषयलाई उठाएको थियो ।
सोही कार्यक्रम हेरेर जापानमा बसोबास गर्दै आएका रुकुमेलीहरुले सहयोग संकलन गरि इन्द्रणी कार्यक्रम संचालक कृष्ण कंडेललाई रकम पठाएको समाजका बरिष्ठ उपाध्यक्ष प्रिन्स पुन मगरले बताए । साथै रुकुमेली समाज जापानले पछिल्लो दिनहरुमा पनि यस्तै सहयोगहरु जारि राख्ने पनि बताए । यो संस्था गत बर्ष मात्रै गठन भएको हो ।
