भक्तपुर । २०८० जेठ २१ गते आइतवार बिहान भन्सार छलीका सामानसहितका दुईवटा कन्टेनरलाई सशस्त्र प्रहरीको राजस्व गस्ती टोलीले नियन्त्रणमा लिएको छ । बिहान करिब सात बजेतिर भक्तपुरको बालकोटस्थित पानी ट्याङ्की नजिकैबाट ती कन्टेनरलाई राजस्व अनुसन्धान विभागबाट खटिएको डीएसपी प्रदीप राईको टोलीले नियन्त्रणमा लिएको बताइएको छ ।
विभाग स्रोतले दिएको जानकारीअनुसार गस्ती टोलीले ना ३ ख ७५१३ र ना ७ ख १५८५ नम्वरका दुईवटा कन्टेनरलाई सामान सहित नियन्त्रणमा लिएको थियो । गोदाममा सामान अनलोड गर्दै गरेको अवस्थामा टोलीले ती कन्टेनरलाई नियन्त्रणमा लिएको हो ।
स्रोतका अनुसार, रसुवा भन्सार कार्यालयबाट सामानको जाँचपास गराई छुटेको भनिएता पनि कर्मचारी र व्यापारीको मिलेमतोमा ठुलै रकम राजस्व छली भएको आशंका गरिएको छ ।
विभागको प्रारम्भिक अनुमान अनुसार ना ७ ख १५८५ नम्वरको कन्टेनरमा सोफा बनाउनका लागि प्रयोग गरिने कपडा रहेको पाइएको छ । अर्को कन्टेनरमा भने जुत्ता र लत्ता कपडा रहेको अनुमान गरिएको छ । दुवै कन्टेर रसुवा भन्सार कार्यालयबाट भन्सार जाँचपास गरी छुटेको स्रोत बताउँछ ।
के कति परिणमको मालवस्तुमा न्युन बिजकीकरण गरी राजस्व छली भएको हो भन्ने एकीन रूपमा खुल्न सकेको छैन । सम्वन्धित आयातकर्ता व्यापारी सम्पर्कमा आएपछि मात्र वास्तविकता बताउन सकिने विभागस्रोतले जानकारी दिएको छ ।
