वीरगञ्ज, १९ माघ । बारा जिल्ला, बिश्रामपुर गाँउपालिका वडा नं ४ बस्ने २७ बर्षीय श्याम किशोर प्रसाद साहलाई श्रोत नखुलेको बिस लाख नगद सहित आज प्रहरीले पक्राउ गरेको छ ।
प्रहरी चौकी इनर्वाबाट खटिएको प्रहरीकाे चेकिङ टोलीले बिरगञ्ज महानगरपालिकाको रजत जयन्तीचोकस्थित सडक खण्डमा प्रदेश २-०३-०११ प ६३४३ नम्बरको मोटरसाइकल रोकी चेकजाँच गर्ने क्रममा निजसँग श्रोत नखुलेको नेपाली रुपैयाँ २०,००,००० (बिस लाख) भेटिएपछि प्रहरीले साहलाई पक्राउ गरेको हो ।
उक्त रकम सहित मोटरसाइकल र निजले प्रयोग गरेको २-थान मोबाईल बरामद गरी साह माथि बैंक तथा वित्तीय संस्था सम्बन्धी ऐन, २०७३ बमोजिमको कसुरमा अनुसन्धान भैरहेको बारा प्रहरीले जनाएको छ ।
