काठमाडौँ, १५ जेठ । पत्रकारको आवरणमा भारतीय नक्कली प्रमाणपत्रको कारोबारमा संलग्न देवराज साउद पक्राउ परेका छन् । अपराध अनुसन्धान महाशाखाको टोलीले उनलाई सोमबार पक्राउ गरेको छ ।
सावदले पुतलीसडकमा सञ्चालन गरेको आर्यन इन्टरनेशनल एजुकेशनल प्रा.लि. र दीपककुमार खत्रीले बागबजारमा संचालन गरेको यामाटो एजुकेशनल प्रा.लि.ले बिभिन्न सरकारी कार्यालयको सरकारी कागजहरु, बिभिन्न शैक्षिक संस्थाहरुको प्रमाणपत्र र भारत उत्तर प्रदेशका शैक्षिक संस्थाहरुको प्रमाणपत्र कीर्ते गर्दैआएको सूचनाका आधारमा प्रहरीले पक्राउ गरेको छ ।
सावद र खत्रीले विगत १० बर्षदेखि भारतका जुनसुकै विश्वविद्यालयका नक्कली प्रमाणपत्र बिक्री बितरण गर्दैआएका थिए । अपराध अनुसन्धान महाशाखाका प्रमुख एसएसपी धिरजप्रताप सिंहका अनुसार सावद र खत्रीले एउटा प्रमाणपत्रको १ लाख ५० हजार रुपैयाँ लिएर बिक्री गर्दैआएको भेटियो । सावद पुलेसो डटकमको पत्रकार भन्दै यस्तो धन्दामा संलग्न रहेको खुलेको छ ।
अख्तियारको फन्दामा घुस्याहा सई
यसैबीच, महानगरीय प्रहरी दरबारमार्ग बृत्तका सई वीरेन्द्र एडी २४ हजार रुपैयाँ घुससहित आज भाटभटेनीको एक रेष्टुरेन्टबाट पक्राउ परेका छन् । अख्तियारको टोलीले उनलाई घुससहित पक्राउ गरेको छ । दरबारमार्गको एक रेष्टुरेन्टबाट मासिक ५ हजार घुस लिने गरेका थिए । ती रेष्टुरेन्टका संचालकले एकमुष्ट ५ महिनाको घुस दिन रेष्टुरेन्टमा बोलाएर अख्तियारको टोलीलाई सूचना दिई पक्राउ गर्न लगाएका छन् ।
