काठमाडौं । आगामी २०७९ मंसिर ४ गते तोकिएको संघीय प्रतिनिधि र प्रदेश सभा निर्वाचन अगाडि नै नेपाल प्रहरीमा कार्यरत तीन जना एआईजी उमेर हदका कारण अनिवार्य अवकास हुँदैछन । निर्वाचनको सुरक्षाका लागि पहिलो पंक्तिमा खटिने नेपाल प्रहरीका उच्च प्रहरी अधिकारीले त्यतिबेलासम्म ५६ वर्ष उमेर पुगेर अनिवार्य अवकास भएर घर जाने भएका हुन् ।
नेपाल प्रहरीका सबैभन्दा सिनियर विश्वराज पोखरेलको आईजीमा बढुवा नभएपछि २०७९ साउन पहिलो साता राजीनामा दिएका थिए । तर, उनको राजीनामा स्वीकृत नभए पनि २०७९ साउन २० गते अनिवार्य अवकास पाइसकेका छन् ।
त्यसैगरी हाल राष्ट्रिय प्रहरी प्रशिक्षण प्रतिष्ठान महाराजगन्जको प्रमुख समादेशक रहेका एआईजी मुकुन्द आचार्य २०७९ भदौ २२ गते बुधवार अनिवार्य अवकासमा जाँदैछन् ।
त्यस्तै, प्रशासन विभाग प्रमुख रहेका एआईजीपी अरुण कुमार बिसीले पनि दशैं मान्न घर जाने र अवकास हुने दिन २०७९ कार्तिक १४ गते नै परेको छ । उपत्यका प्रहरी कार्यालय रानीपोखरीका प्रमुख एआईजीपी रविन्द्र कुमार धानुक नेपालीहरुको महान चाड दशैं र तिहार दुबै मानेर २०७९ कार्तिक २४ गते अवकास पाउने भएका छन् ।
निर्वाचनको कमाण्ड सम्हाल्ने जिम्मेवारी पाएका र हाल निमित्त आइजीपी रहेका सिनियर एआईजी सहकुल थापा, उत्तम सुवेदी र दिवेश लोहनीले भने आईजीपी धीरजप्रताप सिंहसँगै २०७९ चैत्र ११ गते ३० वर्षे सेवा अवधि पूरा गरेर अनिवार्य अवकासमा जाने भएका छन् ।
त्यसभन्दा अघि हाल मानव स्रोत विभाग प्रमुख रहेकी पूजा सिंहले २०७९ फागुन ४ गते उमेर अवकास पाउने भएकी छिन् ।
