काठमाडाैं । सरकाले पुँजीगत खर्च गर्न नसकेकाे अवस्था छ भने ठेकेदारहरूले ठेक्का सम्झाैता अनुसार समयमा काम नसक्दा सरकार र ठेकेदारहरू के गर्दै छन् भन्ने प्रश्न पनि खडा भएका छन् ।
केन्द्रीय सचिवालय रहेकाे सिंहदरबारकाे प्रशासन र शहरी विकास मन्त्रालयकाे के काममा व्यस्त हाेला ? सिंहदरवारभित्रकै निर्माणका ठूला आयाेजनाहरूकाे प्रगतिकाे हालत के हाेला ? अनुगमन गर्ने निकायहरू के गर्दै हाेलान् ?
केन्द्रीय आयोजना इकाई भवन तथा आवास आयोजना अन्तर्गत बबरमहल प्रवलीकरणको ठूला ठेक्का जिसीजिसी, आषिश, समानन्तर जेवीले पाएको थियो । भ्याट बाहेक ८६ करोड २ लाख ५२ हजार ७ सय ५४ रुपैयाँ लागतमा २०७६ असार २५ गते उक्त निर्माण कार्यको जिम्मा ती कम्पनीले पाएका हुन । यही २०७८ चैत मसान्तमा निर्माण कार्य सम्पन्न गर्नेगरी संझौता गरिएको भएपनि निर्धारित समयमा निर्माण कम्पनीले काम सम्पन्न नगर्ने निश्चित प्राय देखिएको छ ।
करिव ९० प्रतिशत काम सम्पन्न भइसकेको बताइएपनि १० प्रतिशत कामको लागि ठेकेदार कम्पनीले तीन महिना म्याद थपको माग गरेको छ । ठेकेदार कम्पनीले आगामी असार मसान्तसम्मको लागि म्याद थपको माग गरेको आयोजना उप–निर्देशक झप्पर सिं बिश्वकर्माले साँघुलाई जानकारी दिए ।
