अछाममा जन्ती बोकेको जीप दुर्घटना हुँदा चार जनाको मृत्यु भएको छ । एक दर्जन बढी घाइते छन् ।
जन्ती बोकेको से १ च १७६३ नम्बरको जीप आइतबार राति ११ बजे पञ्चदेवल बिनायक नगरपालिका–१ मा दुर्घटना भएको हो । जीप विनायक बजारतर्फ फर्किंदै थियो ।
दुर्घटनामा पञ्चदेवल विनायक नगरपालिका–३ का जीवन जैसी, सर्व बोहरा, जीवन न्यौपाने र हिमाल नेपालीको मृत्यु भएको जिल्ला प्रहरी कार्यालय, अछामले जनाएको छ ।
दुर्घटनाका १४ घाइतेलाई नेपालगञ्ज रिफर गरिएको छ । यीमध्ये केहीको अवस्था गम्भीर रहेको प्रहरीले जनाएको छ ।
ब्याक गर्ने क्रममा दुर्घटना भएको जिप सडकबाट करिब २०० मिटर तल खसेको छ । चालक फरार भएपछि प्रहरीले खोजी कार्य थालेको छ ।
