ओली तेस्राेपटक प्रधानमन्त्रीमा नियुक्त, सपथ भोलि 

काठमाडौं । प्रधानमन्त्री केपी शर्मा ओली पुनः प्रधानमन्त्रीमा नियुक्त हुने भएका छन् । 

०७८ वैशाख २७ मा प्रतिनिधिसभाबाट विश्वासको मत नपाएर ओली पदमुक्त भएपछि सोही दिन राष्ट्रपति विद्यादेवी भण्डारीले संविधानको धारा ७६(२) अनुसार बहुमतीय प्रक्रियाबाट सरकार गठन गर्न दलहरूलाई आह्वान गरेकी थिइन् । जसको समयसीमा अहिले राति ९ बजे सकिँदैछ । तर सरकार निर्माण गर्न तम्सिएको कांग्रेसले नै दाबी पेस नगर्ने निर्णय गरेको छ । 

यो अवधिमा कुनै पनि दलले प्रधानमन्त्री दाबी नगरेपछि संविधानको धारा ७६(३) अनुसार पुनः ओली नै प्रधानमन्त्रीमा नियुक्त हुने भएका छन् । संविधानको धारा ७६(३) मा दुई वा सोभन्दा बढी दलले बहुमतीय सरकार बनाउन नसकेमा राष्ट्रपतिले प्रतिनिधिसभाको सबैभन्दा ठूलो दललाई प्रधानमन्त्रीमा नियुक्त गर्ने प्रावधान रहेकाे  छ । 

अब राष्ट्रपति विद्यादेवी भण्डारीबाट आज राति वा भोलि बिहानसम्म प्रधानमन्त्रीमा नियुक्त गरिनेछ । प्रधानमन्त्रीमा ओली नियुक्त भएपछि यो उनको तेस्रो कार्यकाल हुनेछ । सपथ ग्रहण २०७८ वैशाख ३१ गते  शुक्रबार दिउँसो २ देखि ४ बजेसम्ममा हुने सम्भावना छ । 

संविधानको धारा ७६ (३) अनुरूप बनेका प्रधानमन्त्रीले नियुक्ति भएको मितिले ३० दिनभित्र विश्वासको मत लिनुपर्नेछ ।