काठमाडौं, २०७७ भदौ २९ गते। प्रहरी महानिरीक्षक शैलेश थापा क्षेत्रीबाट प्रहरी प्रधान कार्यालयमा भदाै २८ गते आइतबार आयोजित एक कार्यक्रमबीच प्रहरी कर्मचारीहरूले पालना गर्नुपर्ने आचार संहिता सम्बन्धी कार्यादेश-२०७७ सार्वजनिक गरिएको छ । साथै प्रहरी महानिरीक्षक शैलेश थापा क्षेत्रीले नेपाल प्रहरी कार्ययोजना-२०७७ को Implementation Tracking Software समेत सोही अवसरमा शुभारम्भ गरेका छन् ।
![](\"https://sanghunews.com/uploads/news/images/Police%20Acharsinhita%20E.jpg\")
कार्यक्रममा प्रहरी महानिरीक्षक थापा क्षेत्रीले निर्माण भएका कार्यादेश र निर्देशिकाहरुले संगठनलाई सही मार्गमा लैजान दूरगामी रुपमा सकारात्मक प्रभाव पार्ने उल्लेख गरेका छन्। प्रस्तुत कार्यादेशको फलोअप गर्दै जानुपर्नेमा जोड दिँदै प्रहरी महानिरीक्षक क्षेत्रीले यसले प्रहरीको छविलाई थप राम्रो बनाउन मद्दत पुर्याउने विचार व्यक्त गरेका छन् ।
प्रहरी महानिरीक्षक थापा क्षेत्रीले प्रहरी संगठनमा व्यवसायिकता नै मुख्य भएकोले सडकमा समेत व्यवसायिकता देखिने गरी काम गर्न उपस्थित प्रहरी अधिकृतहरुलाई निर्देशन पनि दिएका छन् । सबैको साझा शत्रुको रुपमा कोभिड-१९ लाई लिई यसको नियन्त्रणमा लाग्नु पर्नेमा प्रहरी महानिरीक्षक थापा क्षेत्रीले जोड दिएका छन् ।
कार्यक्रममा प्रहरी अतिरिक्त महानिरीक्षकहरू, प्रहरी नायव महानिरीक्षकहरु र प्रदेश प्रहरी प्रमुखहरुको भर्चुअल्ली उपस्थिति रहेको थियो ।
