काठमाडौं । विश्वव्यापी रूप लिएको कोरोनाले देश आक्रान्त छ । देश महामारीको चपेटामा परे पनि सानादेखि ठूला दलमा अन्तरकलह चुलिएको छ । लाग्छ– अहिलेको मौसम नै झगडाको हो ।
ठूला दलको घर झगडा पर्ख र हेरको अवस्थामा रहे पनि चित्रबहादुर केसी नेतृत्वको राष्ट्रिय जनमोर्चाभित्र भने ‘कू’ नै भएको छ । जनमोर्चाले कोषाध्यक्ष ओमबहादुर केसीलाई पदबाटै बर्खास्त गरेको छ । ०७७ साउन २६ गते काठमाडौंमा बसेको केन्द्रीय समितिको आकस्मिक बैठकले केसीलाई कोषाध्यक्ष र केन्द्रीय सदस्य पदबाट हटाउने निर्णय गरेको जनमोर्चाले विज्ञप्तिमार्फत जनाएको छ ।
एउटा केसीले अर्को केसीमाथि कारबाही गर्दै उनको ठाउँमा हिमलाल पुरीलाई चयन गरेका छन् । पुरी यसअघि जनमोर्चाको सचिव थिए । सचिव र सचिवालय सदस्यको सदस्यको जिम्मेवारी भने डम्मर पुरीलाई दिइएको छ ।
