बर्दिबास, असार १९ – एभरेष्ट बैंक लिमिटेडले आफ्नो शाखा विस्तारलाई निरन्तरता दिंदै महोत्तरी जिल्लाको बर्दिबास नगरपालिका–१ मा १३३औँ शाखा कार्यालयको उद्घाटन गरेको छ। असार १९ गते उद्घाटन गरिएको सो शाखासँगै मधेश प्रदेशमा बैंकको शाखा संख्या १५ पुगेको छ।
नयाँ शाखाको संयुक्त रूपमा उद्घाटन बर्दिबास नगरपालिकाका मेयर प्रहलाद कुमार क्षेत्री र एभरेष्ट बैंकका प्रमुख कार्यकारी अधिकृत सुदेश खालिङले गर्नुभयो। उद्घाटन कार्यक्रममा वडा नं. १ का वडा अध्यक्ष भोला खड्का, बर्दिबास उद्योग वाणिज्य संघका अध्यक्ष विष्णु खड्का, बैंकका मधेश प्रदेश प्रमुख पुष्पराज उप्रेती, बैंकका कर्मचारी तथा स्थानीयवासीहरूको उल्लेखनीय उपस्थिति थियो।
स्थानीय आर्थिक गतिविधिमा टेवा पुग्ने बैंकको विश्वास
बैंकले बर्दिबासमा नयाँ शाखा स्थापना गर्दै यस क्षेत्रका बासिन्दालाई आधुनिक, सरल र सहज बैंकिङ्ग सेवा उपलब्ध गराउने प्रतिबद्धता व्यक्त गरेको छ। साथै बैंकले शाखा विस्तारसँगै स्थानीय आर्थिक गतिविधिमा थप गतिको अपेक्षा पनि राखेको छ।
सशक्त बैंकिङ्ग सञ्जाल
भारतको पंजाब नेशनल बैंकसँग संयुक्त साझेदारीमा सञ्चालित एभरेष्ट बैंकको १४ लाखभन्दा बढी ग्राहक रहेका छन्। देशभर हालसम्म १३३ शाखा, ४ एक्सटेन्सन काउन्टर, ७ प्रादेशिक कार्यालय, र १६८ एटिएममार्फत सेवा प्रदान गरिरहेको छ।
बैंकले मोबाइल, इन्टरनेट र कर्पोरेट बैंकिङ सेवा, साथै नेपाल सरकारको राजस्व संकलनका लागि ३२ वटा संकलन केन्द्र मार्फत सेवा प्रदान गर्दै आइरहेको छ।
अन्तर्राष्ट्रिय उपस्थिति
देशभित्र मात्र नभई भारतको नयाँ दिल्लीसहित अन्य मुलुकहरूमा पनि एभरेष्ट बैंकले प्रतिनिधि कार्यालय स्थापना गरी सेवा विस्तार गरिरहेको छ, जसले अन्तर्राष्ट्रिय स्तरमा समेत बैंकको पहुँच विस्तार भएको संकेत गर्छ।
