काठमाडौँ। भारत सरकारले विमानमा झुटो बम धम्कीका फोन र सन्देशलाई गम्भीरतापूर्वक लिदै संलग्न व्यक्तिहरूको पहिचान गर्न कारबाही थालेको छ। भारतीय मिडियाहरूले उल्लेख गरेका छन् कि भारत सरकारले मेटा र एक्स जस्ता सामाजिक मिडिया प्लेटफर्महरूलाई यस्ता कल र सन्देशहरूको जानकारी साझा गर्न अनुरोध गरेको छ।
सरकारले यी झुटो कलहरू जनताको लागि खतरा भएको भन्दै त्यसको पहिचान गर्न बहुराष्ट्रिय प्रविधि कम्पनीहरूसँग सहयोग मागेको जानकारी प्राप्त भएको छ।
उडानलाई लक्षित गरी बम विष्फोट गर्ने झुटो फोन गर्ने केही व्यक्तिको पहिचान भइसकेको र यस सम्बन्धमा आवश्यक कारबाही भइरहेको रिपोर्टमा उल्लेख छ। यद्यपि सरकारले यी झुटा कल र सन्देश कहाँबाट आएको हो र यसको पछाडि कसको हात छ भन्ने स्पष्ट गरेको छैन।
सरकारले मेटा र एक्सलाई यी गलत कल र सन्देशहरूसँग सम्बन्धित डाटा साझेदारी गर्न अनुरोध गरेको छ। यो विषय जनताको व्यापक हितमा भएकाले यी कम्पनीहरूले सहयोग गर्नुपर्ने भन्दै भारत सरकारले आग्रह गरेको छ।
केही सातादेखि भारतमा धेरै उडानहरूले बम राखिएको बारे गलत कल र सन्देशहरू आएपछि सयौं उडान प्रभावित भएका छन्। पछिल्लो नौ दिनमा भारतका १७० भन्दा बढी उडानलाई यस्तो धम्की आएको बताइएको छ, जसमा केही अन्तर्राष्ट्रिय उडानहरू पनि समावेश छन्।
