काठमाडौं/महोत्तरी । महोत्तरीको बर्दिबास क्षेत्रमा बेवारिसे अवस्थामा छाडिएका दुई वटा भारतीय नम्बर प्लेटका कार प्रहरीले नियन्त्रणमा लिएको छ।
जिल्ला प्रहरी कार्यालय महोत्तरीका अनुसार २०८३ वैशाख ५ गते राति करिब २:३० बजे बर्दिबास नगरपालिका–३ अन्तर्गत काडे भोगटे पुलदेखि करिब ५ सय मिटर उत्तर, बी.पी. राजमार्ग सडकखण्डमा BR 21 AC 4761 र DL 2 CQ 7816 नम्बरका दुई कार शंकास्पद रूपमा बेवारिसे अवस्थामा फेला परेका हुन्।
प्रहरीले जिल्ला प्रहरी कार्यालय तथा मातहतका इकाइबाट खटिएको टोलीमार्फत दुवै सवारी नियन्त्रणमा लिएको जनाएको छ। बरामद कारको अनुमानित मूल्य करिब २० लाख रुपैयाँ रहेको बताइएको छ।
नियन्त्रणमा लिइएका ती दुवै कारलाई २०८३ वैशाख ७ गते आवश्यक कारबाहीका लागि जलेश्वर भन्सार कार्यालय, महोत्तरी पठाइएको प्रहरीले जनाएको छ।
बी.पी. राजमार्गजस्तो संवेदनशील सडकखण्डमा बेवारिसे अवस्थामा दुई-दुई वटा भारतीय कार फेला पर्नु आफैंमा चासोको विषय बनेको छ। ती सवारी कसले, किन र कुन प्रयोजनका लागि त्यहाँ छाड्यो भन्ने विषयमा थप अनुसन्धान आवश्यक देखिएको छ।
चालकविहीन र दर्ता बाहिरका यस्ता सवारी आवतजावत, तस्करी वा अन्य शंकास्पद गतिविधिसँग जोडिएका हुन सक्ने आशंकालाई स्थानीयले समेत गम्भीर रूपमा हेरेका छन्। प्रहरीले भन्सार प्रक्रिया अघि बढाएसँगै अब यस घटनाको वास्तविक पाटो खुल्ने अपेक्षा गरिएको छ।
