काठमाडौं । गृहमन्त्री बनेको २७ दिनमै २०८३ वैशाख ९ गते सुदन गुरुङले राजीनामा दिएपछि सरकारभित्र नयाँ हलचल सुरु भएको छ। अहिले सत्ता वृत्तमा एउटै प्रश्न घुमिरहेको छ-नयाँ गृहमन्त्री को बन्छ ?
रास्वपा निकट स्रोतका अनुसार गृह मन्त्रालयका लागि तीन नाम चर्चामा आएका छन्-सरकारका प्रवक्ता तथा शिक्षा, विज्ञान तथा प्रविधिमन्त्री सस्मित पोखरेल, सांसद राजुनाथ पाण्डे र सांसद दिपक बोहोरा। यी तीनै नामले सरकारभित्रको आन्तरिक शक्ति सन्तुलनलाई प्रत्यक्ष प्रतिनिधित्व गर्छन्।
तीमध्ये सस्मित पोखरेलको नाम अग्रपंक्तिमा रहेको बताइन्छ। उनी न त कुनै एउटा गुटसँग अत्यधिक नजिक देखिन्छन्, न त स्पष्ट रूपमा विवादास्पद। यही कारणले उनी ‘बीचको विकल्प’का रूपमा अगाडि बढेका छन्। स्रोतहरूका अनुसार अहिले गृह मन्त्रालयमा कसैलाई जिताउनेभन्दा पनि सन्तुलन मिलाउने पात्र खोज्ने दबाब सरकारभित्र बढेको छ।
उता, राजुनाथ पाण्डे बालेन शाह निकट मानिन्छन् भने दिपक बोहोरा सभापति रवि लामिछानेको विश्वासपात्रका रूपमा चिनिन्छन्। यसले गृह मन्त्रालयको दौड केवल व्यक्तिको योग्यताभन्दा पनि राजनीतिक नजिकपन र शक्ति परीक्षणमा केन्द्रित भएको संकेत गर्छ।
गृह मन्त्रालय आफैंमा सरकारको सबैभन्दा संवेदनशील निकाय हो-सुरक्षा संयन्त्र, अनुसन्धान र प्रशासनिक नियन्त्रणको केन्द्र। त्यसैले गुरुङको राजीनामापछि उत्पन्न परिस्थितिमा नयाँ गृहमन्त्री चयन केवल औपचारिक प्रक्रिया होइन, सरकारको विश्वसनीयता पुनःस्थापना गर्ने महत्वपूर्ण निर्णय बन्ने देखिएको छ।
अहिलेको अवस्था हेर्दा स्पष्ट छ-सरकारभित्र समझदारी, दबाब र रणनीतिक सन्तुलनको खेल चलिरहेको छ। अन्ततः निर्णय कसको पक्षमा जान्छ भन्ने कुराले आगामी राजनीतिक समीकरण मात्र होइन, सरकारको कार्यदिशा समेत तय गर्नेछ।
