काठमाडौं, २०८३ वैशाख ५ गते । नागार्जुन नगरपालिका–१ स्थित जामाचो क्षेत्रमा हाइकिङका क्रममा दुर्घटनामा परेकी एक महिलाको नेपाली सेनाले सकुशल उद्धार गरेको छ ।
धादिङ जिल्ला निवासी २९ वर्षीया ती महिला जामाचो क्षेत्रमा हाइकिङ गर्ने क्रममा खुट्टा अल्झिएर करिब ५० मिटर तल खस्दा गम्भीर अवस्थामा बेहोस भएकी थिइन् । घटनाको जानकारी प्राप्त हुनासाथ नेपाली सेनाको भैरवीदल गणबाट खटिएको उद्धार टोली तुरुन्तै घटनास्थल पुगेको थियो ।
दुर्गम तथा भिरालो भौगोलिक अवस्थाका बीच जोखिमपूर्ण ढंगले सञ्चालन गरिएको उद्धार अभियानमार्फत सेनाले ती महिलालाई सुरक्षित रूपमा माथि ल्याउन सफल भएको जनाएको छ । उद्धारपछि उनलाई तत्काल आवश्यक उपचारका लागि नजिकको स्वास्थ्य संस्थातर्फ पठाइएको थियो ।
नेपाली सेनाका अनुसार जामाचो जस्तो पर्यटकीय तथा हाइकिङ गन्तव्यमा पछिल्ला दिनमा आगन्तुकको संख्या बढ्दै गइरहेको अवस्थामा यस्ता दुर्घटनाहरू पनि बढ्ने जोखिम रहने भएकाले सावधानी अपनाउन आग्रह गरिएको छ ।
यस घटनाले आपतकालीन अवस्थामा नेपाली सेनाको द्रुत उद्धार क्षमता र समन्वयकारी भूमिकालाई पुनः पुष्टि ग
