गोरखामा देउसी–भैलो राति ९ बजेसम्म मात्र

गोरखा । तिहारमा खेलिने देउसी, भैलो र नाँचगान जस्ता कार्यक्रम राति ९ बजेसम्म गर्न गोरखामा जिल्ला प्रशासन कार्यालयले समय तोकेको छ ।

गोरखाका प्रमुख जिल्ला अधिकारी दिनेशसागर भुसालले बिहीवार विज्ञप्ति जारी गर्दै देउसी भैलोका लागि समय तोकेका हुन् ।

उनले पटका, आतसबाजी जस्ता पदार्थहरुको आयात, बिक्री वितरणमा रोक लगाएको उल्लेख गरेका छन् ।

त्यस्तै, अखाद्य वस्तु मिसाएको र म्याद गुज्रेको मिठाई, प्लाष्टिकजन्य फूल लगायतका ओसारपसार र बिक्री वितरणमा पनि रोक लगाइएको छ ।

मादक पदार्थ सेवन गरी सार्वजनिक स्थलमा होहल्ला र शान्ति सुरक्षामा खलल नगर्न पनि प्रशासनले अपिल गरेको छ ।