२० वर्षपछि अफगानिस्तानबाट अमेरिकी सेना पूर्ण रूपमा फिर्ता भएको छ । अमेरिकी सेना फिर्ताका लागि तालिवानले दिएको अगस्ट ३१ को समयसीमाभित्र अमेरिकी सेनाले अफगानिस्तान छाडेको हो. ।
यसअघि अफगानिस्तानबाट हजारौं अमेरिकी सेना फिर्ता भए पनि विमानस्थलमा भने पहरा जारी राखेकाे थियाे । तालिवानले अफगानिस्तान कब्जा गरेपछि यहीबीचमा हजारौंको उद्धार गरिएकाे छ ।
बीबीसीका अनुसार, काबुलस्थित अमेरिकी राजदूत रस विल्सन र त्यहाँ रहेका अमेरिकी कमान्डर जनरल क्रिश डोनाह्यु अन्तिम उद्धार उडानमा सहभागी भएका छन् ।
योसँगै अमेरिकाको २० वर्षदेखिको अफगानिस्तान मिसन समाप्त भएको छ ।
सन् २००१ को सेप्टेम्बर ११ मा पेन्टागन आक्रमण भएको केही समयपछि अमेरिकाले त्यहाँ आफ्नो सेना तैनाथ गरेको थियो । त्यहाँ अमेरिकी सेनाको तैनाथीपछि नै ओसामा विन लादेन तथा उनका थुप्रै अल कायदासँग सम्बद्ध व्यक्तिमाथि कारबाही गरिएको थियो ।
अमेरिकी सेनाले पूर्ण रूपमा अफगानिस्तान छाडेपछि बिद्रोहमार्फत सत्ता कब्जा गर्न सफल तालिवानहरूले खुसीयाली मनाएका छन् । काबुलमा मेसिन गनमार्फत गोली चलाएर तथा रात्रिकालीन आकाशमा रातो प्रकाश छरेर तालिवानीले खुसी मनाएकाे बीबीसीले जनाएकाे छ ,।
