काठमाडौं । भारतको महाराष्ट्रमा लकडाउन घोषणा गरिएकोमा त्यसले नपुगेर कर्फ्यू जारी गरिएको छ ।
कोभिड–१९ को संक्रमण ग्राफ उकालो लागेपछि त्यसलाई न्यूनीकरण गर्ने हेतुले त्यहाँ सोमबारदेखि लकडाउन र कर्फ्यूको घोषणा गरिएको हो ।
तर कर्फ्यू दिनमा नभएर रातको समयमा मात्र लगाइनेछ । त्यसैगरी लकडाउन पनि सप्ताहन्तका बेला मात्र हुनेछ ।
भारतमा कोरोनाको अर्को लहर सुरु भएको छ । आइतबार मात्र त्यहाँ एकैदिन ९३,२४९ जनामा संक्रमण पुष्टि भएको थियो । जसको आधाभन्दा बढी संख्या महाराष्ट्र राज्यको छ ।
स्वास्थ्य मापदण्ड पालनामा आममानिसले बेवास्ता गरेकाले कोरोना बढेको महाराष्ट्र राज्यले बताएको छ । यसका मुख्यमन्त्री उद्धव ठाकरेले टेलिभिजन सम्बोधन गर्दै केही मानिसहरूले सुरक्षाका उपायहरू नअपनाएको र मास्क लगाउन छाडेका कारण खोप लगाएपछि पनि संक्रमण ह्वात्तै बढेको जिकिर गरे ।
महाराट्रमा कोरोना ह्वात्तै फैलिएपछि भारतका प्रधानमन्त्री नरेन्द्र मोदीले त्यसको कारण पत्ता लगाउन निर्देशन दिएका छन् । लगत्तै एउटा विशेष टोली त्यसतर्फ जान लागेको छ ।
