काठमाडौं । प्रधानमन्त्री केपी शर्मा ओली आज निर्वाचन आयोग जाने भएका छन् ।
निर्वाचन तयारीबारे बुझ्न प्रधानमन्त्री ओली अहिले बिहान ११ बजे आयोग जान लागेको उनको सचिवालयले जनाएको छ ।
त्यस्तै, नेकपाका दुई पक्षबीचको विवाद, निर्वाचन चिह्नलगायत विषयमा पनि छलफल हुने बताइएको छ ।
सरकारले आगामी वैशाख १७ र २७ मा गर्ने गरी मध्यावधि निर्वाचन घोषणा गरेको छ । संसद् विघटनबारे सर्वोच्चमा परेको मुद्दाको किनारा लाग्न बाँकी रहेकाले आयोग पूर्ण रूपमा निर्वाचनमा होमिने अवस्था अझै बनेको छैन । यद्यपि, आयोगले निर्वाचनमा होमिइसकेको जनाएको छ ।
त्यस्तै, नेकपामा कुन समूह आधिकारिक भन्ने विवाद पनि निमटारा लाग्न सकेको छैन । दुवै समूह केपी ओली र प्रचण्ड–माधव नेपाल समूहले आफूलाई आधिकारिकता दाबी गर्दै आएका छन् । प्रथम अध्यक्ष र महासचिव आफूतिर रहेकाले आफ्नो समूह आधिकारिक भएको ओली समूहको दाबी छ ।
