दमौली, १३ जेठ (रासस) : पृथ्वीराजमार्गअन्तर्गत तनहुँको शुक्लागण्डकी नगरपालिका–२ गाछेपानीमा जेठ १३ गते जीपको ठक्करबाट मोटरसाइकल चालकको मृत्यु भएको छ । मृत्यु हुनेमा इलाम माइजुमाई गाउँपालिका–३ प्वाङ बस्ने २६ वर्षीय शैलेश लिम्डुम रहेको जिल्ला प्रहरी कार्यालयले जनाएको छ ।
पोखराबाट दमौलीतर्फ आउँदै गरेको ग २ च ९६२२ नं को दूध बोक्ने जीप र विपरीत दिशाबाट जाँदै गरेको मे ५ प ९२९६ नंको मोटरसाइकल एकापसमा ठोक्किँदा घाइते भएका लिम्डुमको बेलचौतारास्थित जिपी कोइराला श्वासप्रश्वास उपचार केन्द्रमा उपचारका क्रममा मृत्यु भएको प्रहरी नायब उपरीक्षक लीलाराज लामिछानेले जानकारी दिए ।
मृत्यु हुने लिम्डुम नेपाली सेना गौरीबक्स गुल्म पोखरामा कार्यरत रहेको प्रहरीले जनाएको छ ।
–––
