बनेपा, ३० चैत (रासस) : काभ्रेपलाञ्चोकको बनेपाबाट साँगातर्फ जाँदै गरेको मोटरसाइकललाई सोही दिशातर्फ जाँदै गरेको ट्रकले ठक्कर दिँदा मोटरसाइकल चालकको मृत्यु भएको छ । अर्का एक व्यक्ति गम्भीर घाइते भएका छन् ।
चैत २९ गते साँझ बनेपा नगरपालिका–१३ भैँसेपाटी चोक नजीकै बा ७९ प ९३८८ नंको मोटरसाइकललाई ना ३ ख ६७८३ नंको ट्रकले पछाडिबाट ठक्कर दिँदा बनेपा नगरपालिका–५ का २८ वर्षीय गणेश तामाङको मृत्यु भएको हो । उनको धुलिखेल सामुदायिक अस्पतालमा उपचारका क्रममा मृत्यु भएको प्रहरी निरीक्षक दीपक रायले जानकारी दिए ।
मोटरसाइकलमा सवार सोही ठाउँका २५ वर्षीया यशोदा हमाल गम्भीर घाइते भएकी छिन् । उनलाई उपचारका लागि काठमाडौँस्थित नर्भिक अस्पताल लगिएको छ । ट्रक चालकलाई प्रहरीले नियन्त्रणमा लिएको छ ।
