काठमाडौं । संघीय सरकार यतिबेला आर्थिक वर्ष ०८२–०८३ को लागि बजेट निर्माणको तयारीमा जुटेको छ । स्थानीय तह, प्रदेश मन्त्रालयबाट संघ अन्तर्गतका विकासे मन्त्रालयसमक्ष योजना माग गर्नेक्रम यतिखेर निकै बढेको पाइएको छ ।
उर्जा, जलश्रोत तथा सिंचाईं, भौतिक पूर्वाधार तथा यातायात, खानेपानी, संस्कृति, पर्यटन तथा नागरिक उड्डयन, युवा तथा खेलकुद, शहरी विकासलगायत मन्त्रालयहरुमा आवश्यक कागजातसहित योजना माग गर्नेहरुको भिड बढी नै देखिएको छ । अझ नेपाली काँग्रेसका नेता प्रकाशमान सिंहले संहाल्दै आएको शहरी मन्त्रालयमा योजना माग गर्नेहरुको संख्या थामी नसक्नु गरी बढेको स्रोतले जानकारी दिएको छ । नेपाली कांग्रेस, नेकपा एमाले, लोकतान्त्रिक समाजवादी पार्टी र जनता समाजवादी नेपालको गठबन्धनबाट वर्तमान सरकार गठन भएको हो । नेकपा एमाले अध्यक्ष केपी शर्मा ओली नेतृत्वको सरकारले आठ महिना पार गरेर नौ महिनामा हिंडिरहेको छ । यो बीचमा ओली नेतृत्वको सरकारले सर्वसाधारण जनताका उल्लेखनीय काम केही गर्न नसकेको आरोप खेप्दै आएको छ ।
वर्तमान सरकारका केही मन्त्रीको कार्यशैली र असक्षमताले नेपाली नागरिक र निजामती प्रशासनका केही इमान्दार कर्मचारीहरू आजित हुन थालेको गुनासो सुनिन्छ । हाल नेपाली कांग्रेसको तर्फबाट सरकारको नेतृत्व उप–प्रधान तथा शहरी विकास मन्त्री प्रकाशमान सिंहले गर्दै आएका छन् । उनी स्यवम् विरामी अवस्थामै सरकारमा गएका थिए । त्यसकारण पनि उनको कार्यसम्पादन मन्त्रालयमा सन्तोषजनक नरहेको गुनासो सुनिन्छ ।
उक्त मन्त्रालयको नेतृत्व गर्नु अघि मन्त्री सिंह छिमेकी मुलुक भारतमा प्रोष्टेट क्यान्सरको उपचारमा रहेका थिए । नेपाल फर्किए लगत्तै २०८१ साउनमा उनी नेपाली काँग्रेसबाट सरकारको नेतृत्व गर्दै ओली सरकारमा सहभागी भएका थिए । उनले कांग्रेसको तर्फबाट सरकारमा रहेर कांग्रेस सभापति शेरबहादुर देउवा र प्रधानमन्त्री ओलीबीच विशेष भूमिका खेलेर समन्वय गर्नुपर्ने थियो ।
तर, विरामी अवस्था र त्यति खट्न नसकेको कारण अहिले गृहमन्त्री रमेश लेखकले कांग्रेसकोतर्फबाट सभापति देउवा र प्रधानमन्त्री ओलीसँग राजनीति वार्ता र सम्बादको समन्वय गर्दै आएको स्रोतले दावी गरेको छ । जसले गर्दा मन्त्रालय सञ्चालनमा पनि मन्त्री सिंहको कार्यसम्पादन उपलब्धिमूलक, उत्साहजनक देखिंदैन । उनले ८ महिनाको अवधिमा धरहरा सञ्चालनमा ल्याएको, त्रिविको अन्तर्राष्ट्रिय क्रिकेट मैदानको प्यारामिटर निर्माण, फ्लड लाइट जडानको कार्य अगाडि बढाउन सफल भएको दावी गरेका छन् ।
योसँगै ३५ वटा स्थानीय तहहरूको भवन निर्माण सम्पन्न गरेको उपलब्धि स्वकीय सचिव युपी लामिछानेमार्फत सार्वजनिक गरेका थिए । कांग्रेसको भावी सभापति र प्रधानमन्त्रीको आकांक्षी रहेको उद्घोष गरिसकेका मन्त्री सिंहले मन्त्रालयभित्र दरबन्दी अनुसार कर्मचारीहरूको व्यवस्थापन गर्न सकिरहेका छैनन् । प्रशासनका सहसचिव काम नपाएर ‘बरण्डा’मा हाजिर गरेर हिंडिरहेका छन् । तर, मन्त्रालयमा भने यतिखेर खुद्रे योजना माग गर्नेहरुको भिड निकै बढेको देखिन्छ ।
संघीय सरकारले रु. तीन करोड भन्दा कमका योजनामा बजेट बिनियोजन नगर्ने बताइसकेको छ । तरपनि मन्त्रालयमा सो रकम भन्दा कमका योजना मागसहितको कागजात बोकेर माग गर्नेहरुको संख्या किन दिनहुँ बढेको छ भन्दै कर्मचारीहरुले प्रश्न तेस्र्याएका छन् । सरकारले लक्ष्यअनुसार राजश्व संकलन नभएको भन्दै चालु खर्च धान्नका लागि आन्तरिक ऋण उठाउन बाध्य भएको छ । तर, मन्त्रालयका देखिएको योजना माग गर्नेहरुको भिडका कारण मुलुकमा कुनै आर्थिक संकट नरहेको जस्तो भान पर्छ ।
उता, मन्त्रालयमातहका एकदर्जन भन्दा बढी कार्यालयहरूमा इन्जिनियरहरुले कामु कार्यालय र आयोजना प्रमुखको जिम्मेवारी बहन गर्दै आएका छन् । ती कार्यालयहरुमा सिडिईको दरवन्दी रहेको छ । तर, मन्त्री सिंह भन्दा पनि निजी सचिवको भूमिकामा रहेका अधिकृत बासुदेव खनाल र लामिाछने बढी हावी भएर बेथितिमा रमाएर मनपर िसरुवा गर्दै आएका छन् । पटक–पटक मन्त्री र उप–प्रधानमन्त्री भइसकेका सिंहले मन्त्रालयमा नवीन र सिर्जनात्मक काम गरेर देखाउन भने सकिरहेका छैनन् । त्यसकारण मन्त्रालय पुरानै ढर्रा अनुसार नै संचालन भइरहेको कर्मचारी स्रोत बताउँछ ।
अव्यवस्थित रुपमा बसोबास भैरहेको बेलामा केही नगरमा पाँच वर्षभित्रै नमुना शहरको विकास गर्ने विषयमा मन्त्री सिंहको कुनै ध्यान जान सकेको देखिंदैन । प्रशासनिक भवन निर्माण कार्य तीव्रगतिमा र गुणस्तरीय रुपमा गर्नेतर्फ मन्त्री सिंहका कुनै योजना र कार्यक्रम रहेका छैनन् । उनी यथास्थितिमै रमाएर कांग्रेसको भावी सभापति र मुलुकको भावी प्रधानमन्त्री हुने सपना देखेर हिंडिरहेका छन् । (साँघु साप्ताहिक, २०८१ चैत १८)
2025-03-15-08-03-23.jpeg)
प्रतिकृया दिनुहोस