काठमाडौं । त्रिभुवन विश्वविद्यालयको इतिहासमै दुर्लभ घटना भएको छ, उपकुलपति पदबाट राजीनामा । अहिलेका उपकुलपति केशरजंग बरालको हकमा पनि त्यही भएको छ । उपकुलपति भएको एक बर्षमै बरालले राजीनामा दिन बाध्य भएका छन् । त्रिभुवन विश्वविद्यालयका करारका शिक्षकहरुको दवाव र अति राजनीतिकरणका कारण सुशासनका पक्षधर बराल त्रिविको उपकुलपति पद छाड्न बाध्य भए । त्रिविका अधिकारीका अनुसार, करारका शिक्षकले जसरी पनि आफूहरुलाई स्थायी नियुक्ति दिलाउनुपर्ने भनेर दबाब दिइरहेका थिए ।
त्रिविमा ३ देखि ४ सय शिक्षक करारमा रहेका छन् । उनीहरुले त्रिवि सेवा आयोगबाट लिने भनिएको खुला प्रतिस्पर्धाको विरोध गर्दै करार शिक्षकको संख्या गनेर स्थायीको विज्ञापन गर्न दबाब दिएका थिए । तर, सर्वोच्च अदाललते भने उक्त प्रक्रियाबाट नभई खुला प्रतिस्पर्धाबाट शिक्षक नियुक्त गर्न फैसला गरेको थियो । सर्वोच्च फैसला अनुसार उपकुलपति बराल जानुपर्ने अडानमा थिए । तर, एमाले, माओवादी र कांग्रेसनिकट ती करार शिक्षकहरु जसरी पनि आफूहरुलाई स्थायी गर्नुपर्ने अडानमा रहेको त्रिवि अधिकारीले बताए ।
स्रोतका अनुसार, दिनदिन बरालको कार्यकक्षमा गएर दवाव दिने र धम्की दिनुका साथै त्रिविका अधिकारीलाई अनुचित दवाव दिएर समस्या पार्ने गरिरहेका थिए । उपकुलपति बरालले उनीहरुको दबाब नटेर्ने अडानमा थिए । त्रिवि सुधारका लागि उक्त अडानलाई साथ दिनुपर्नेमा कुशासनका पक्षधर राजनीतिक दलहरुले आफ्ना कायर्कर्तालाई साथ दिएका थिए । राजनीतिक दलहरुबाट पनि बरालमाथि दबाब परिरहेको थियो । राजनीतिक दलको फेरो समातेर करारको नियुक्ति खाएका ती शिक्षकले दलहरुबाट पनि दवाव दिन थालेपछि बराल झन् अप्ठ्यारोमा परेका थिए । त्यसो बरालले रेक्टर र रजिस्टार नियुक्तिमा पनि आफ्नो सहजताका लागि रोजेका थिए । त्यतिबेला पनि त्रिविमा दलनिकट प्राध्यापक संगठनहरुले विरोध गरेका थिए ।
केही भने आफै जानका लागि पनि विरोध गरेका थिए । मुख्यगरी रेक्टर खड्ग केसीको विरोधमा एमालेनिकट प्राध्यापकहरु विरोधमा रहेका थिए । तर, बरालको अडानका कारणले नै केसीले निरन्तरता पाएका थिए । तर, अहिले तिनै केसी पनि बरालको साथमा रहेनन् । रजिस्टार केदार रिजाल पनि त्यस्तै भएका थिए । आफैले रोजेर ल्याएका रिजाल र केसी पनि असहयोगी बनेपछि सुशासनका पक्षधर त्रिविका उपकुलपति बराल एक्लोजस्तो हुन पुगेको त्रिवि अधिकारीहरुको बनाइ छ । स्रोतका अनुसार, केसी र रिजाल भने कांग्रेस र एमालेको गठबन्धन भएपछि बरालका असहयोगी बनेका थिए ।
त्यतिमात्र होइन, बरालले खुला प्रतिस्पर्धाबाट डीन नियुक्ति गर्दा पनि समस्या भएको थियो । त्यतिबेला कार्यकारी परिषद्को बैठकमा डीन नियुक्तिको विषयमा विवादमा परेको थियो । मेरिटका आधारमा नियुक्ति गर्न खोज्दा बराल एक्लो परेका थिए । प्रधानमन्त्री तथा कुलपति केपी ओलीसमेतको दवावमा डीनहरुको सूची हेरफेर भएको थियो । अनि, क्याम्पस प्रमुखहरुको नियुक्तिमा पनि खुला प्रतिस्पर्धा गराएर क्याम्पस प्रमुख नियुक्त गरेका थिए । यी सबै प्रक्रियामा बरालमाथि त्रिविका शिक्षकहरु विरोधमा थिए । त्यसैले, निरन्तर रुपमा संगठित भएर अनुचित दवाव दिन थालेपछि त्रिविको उपकुलपतिबाट बरालले राजीनामा दिन बाध्य भएको दावी गरिएको छ । (साँघु साप्ताहिक, २०८१ चैत १८)
-(1)2025-04-03-12-04-30.jpeg)
प्रतिकृया दिनुहोस