काठमाडौं । नेपाल प्रहरीमा नयाँ प्रहरी महानिरीक्षक (आईजीपी) नियुक्त भएपछि प्रहरी मुख्यालयभित्रका महत्त्वपूर्ण, जिम्मेवारी, र संवेदनशील पदहरूमा हेरफेर हुनु स्वाभाविक मानिन्छ । नयाँ आईजीपीको सोच अनुसारको नीति र कार्यसम्पादन उत्कृष्ट बनाउन प्रहरीको सरूवा, बढुवा, र जिम्मेवारी हेरफेर गर्ने परम्परा विगतदेखि चल्दै आएको आन्तरिक नीति नै हो ।
नयाँ प्रहरी प्रमुखले आफ्नो कार्यकाल र नेतृत्वलाई सहज बनाउन तथा सहयोगी र विश्वासपात्र अधिकारीहरूलाई महत्त्वपूर्ण जिम्मेवारी दिने अभ्यास रहँदै आएको छ, ताकि नेतृत्वलाई समर्थन मिलोस् र संगठन प्रभावकारी रूपमा अघि बढोस् ।
सरकारले तत्कालै ६ जना डीआईजीपीलाई एआईजीपीमा बढुवा गर्ने प्रक्रिया अगाडि बढाउनु रहेको छ । यसका लागि पनि आईजीपी थापा व्यस्त हुनुपर्ने अवस्था रहेको छ । २०८१ चैत ४ गते, नेपाल प्रहरीका महानिरीक्षक दीपक थापा प्रमुख बनेको धेरै समय पनि भएको छैन ।
दीपक थापा प्रमुख बनेपछि सडक संघर्ष चर्किंदै गएको छ । काठमाडौं उपत्यका केही दिनदेखि अशान्त रहेको छ । पत्रकार समेत मारिने, दिउँसै लुटपाट र आगजनीक घटनाहरु भइरहेका छन् ।
शान्ति सुरक्षामै केन्द्रित दीपक थापा प्रमुखले अहिलेसम्म मुख्यालयका अति महत्त्वपूर्ण पदहरूमा कुनै हेरफेर गरेका छैनन् । तर, हालै केन्द्रीय लेखा शाखाका प्रमुख डीएसपी निर्मल बुढाथोकी एसपी पदमा बढुवा भएपछि रिक्त उक्त स्थानमा डीएसपी दीपेन्द्र शाही नियुक्त भएका छन् ।
शाही यसअघि केन्द्रीय अनुसन्धान व्यूरो (CIB) मा कार्यरत रहेका थिए, जहाँ दीपक थापा आईजीपी नियुक्त हुनुअघि प्रमुख थिए । शाही यसअघि प्रहरी कल्याण निर्देशनालयमा पनि कार्यरत थिए । २०७० सालमा असई (सहायक निरीक्षक)बाट प्रहरी सेवामा प्रवेश गरेका उनी पछि प्रहरी निरीक्षकमा बढुवा भएका थिए ।
प्रहरी मुख्यालयमा छिट्टै हेरफेरको सम्भावना
नेपाल प्रहरीको सबैभन्दा आकर्षक मानिने प्रवन्ध शाखामा आउन सक्ने केही एसपीहरूको नाम चर्चामा छ । हाल प्रवन्ध शाखामा रहेका एसपी गोविन्द पुरीको कार्यकाल सकिन लागेको र उनलाई जिल्ला कमाण्डमा पठाउन सकिने अनुमान गरिएको छ । यदि उनी अन्यत्र सरुवा भएमा रिक्त प्रवन्ध शाखामा निम्न तीन एसपीहरू चर्चामा रहेका छन् :
निर्मल बुढाथोकी–हालै लेखा शाखाबाट एसपीमा बढुवा भएका ।
नवराज मल्ल–पहिले भण्डार शाखामा कार्यरत ।
किशोर श्रेष्ठ–पहिले कल्याण, आलेप जस्ता महत्त्वपूर्ण आर्थिक प्रशासनसँग सम्बन्धित शाखामा कार्यरत ।
नेपाल प्रहरीको लेखा, प्रवन्ध, भण्डार, आलेप, र बजेट शाखामा बस्ने एसपीहरूले आर्थिक ऐन, नियम, तथा प्रशासनसम्बन्धी गहिरो ज्ञान राख्नुपर्ने भएकाले यसपटक प्रवन्ध शाखामा आउने अधिकारीको छनोट अत्यन्तै रणनीतिक हुने चर्चा छ । नव नियुक्त आईजीपी दीपक थापाले चर्चामा रहेका ती एसपीहरूमध्ये कसलाई ल्याउनेछन् वा उनको प्राथमिकतामा अन्य कोही छ कि भन्ने विषय भने केही समयपछि स्पष्ट हुनेछ ।
निष्कर्ष
नयाँ आईजीपी नियुक्तिपछि प्रहरी मुख्यालयमा महत्त्वपूर्ण स्थानहरूमा हेरफेर हुने सम्भावना उच्च छ । प्रहरी संगठनको नीति र आईजीपी थापाको रणनीतिअनुसार, मुख्यालयका महत्त्वपूर्ण शाखाहरू र केही जिल्ला प्रहरी प्रमुखहरुमा नयाँ अनुहारहरू देखिन सक्नेछन् । प्रहरी संगठनभित्रको यो आन्तरिक हेरफेरले प्रहरी प्रशासनलाई अझ प्रभावकारी बनाउन मद्दत गर्ने विश्वास गरिएको छ । (साँघु साप्ताहिक, २०८१ चैत १८)
2025-04-02-08-04-30.jpeg)
प्रतिकृया दिनुहोस