लहान २० बैशाख । प्रहरीले शुक्रबार सिरहाका छुट्टाछुटै स्थानबाट कटुवा पेस्तोल र लागुऔषधसहित दुई भारतीयसहित चार युवकलाई पक्राउ गरेको छ ।
गोप्य सूचनाका आधारमा प्रहरी चौकी र सशस्त्र प्रहरी वल ठाडीको संयुक्त टोलीले भगवानपुर गाउँपालिका–४ स्थित दशगजा मिनी बजार नजिकबाट कटुवा पेस्तोलसहित भारतको मधुबन्नी जिल्ला ग्राम पञ्चायत बगहा–१ निवासी २८ वर्षीय राजेशकुमार यादवलाई पक्राउ गरेको हो ।
पक्राउ परेका यादवको साथवाट कटुवा पेस्तोल एक थान र खाली खोका एक राउण्ड बरामद भएको जिल्ला प्रहरी कार्यालयका प्रवक्ता तथा प्रहरी नायब उपरीक्षक माधवराज खरेलले जानकारी दिए ।
त्यस्तै सिरहाको भगवानपुर–१ स्थित हुलाकी सडक खण्डबाट लागुऔषधसहित भारतको मधुबनी जिल्ला ग्रामपञ्तायत माधवपुर निवासी १७ वर्षीय उज्वलकुमार यादव र १८ वर्षीय शिवमकुमार साहलाई पक्राउ गरेको छ ।
दुवैको साथबाट डाइलेक्सडिसी १०० एमएल २० बोतल बरामद गरिएको प्रवक्ता खरेलले जानकारी दिए । यस्तै सिरहा नगरपालिका–१७ पटहेर्वाबाट लागुऔषधसहित सिरहाको मिर्चैया नगरपालिका–३ निवासी २६ वर्षीय सुनिल यादवलाई प्रहरीले पक्राउ गरेको छ ।
इलाका प्रहरी कार्यालय माडर र सशस्त्र प्रहरी बल सिरहाबाट खटिएको संयुक्त टोलीले डाइलेक्स डिसी १०० मिलीग्रामको ४९ बोतल लागुऔषधसहित यादवलाई पक्राउ गरेको हो ।
सवारी साधन जाँच गर्ने क्रममा ज ९ प १५७४ नम्बरको मोटरसाइकलमा प्लाष्टिकको झोलामा लुकाइराखेको उक्त परिमाणको लागुऔषध फेला पारेकाले मोटरसाइकलसहित यादवलाई पक्राउ गरिएको प्रवक्ता खरेलले बताए । रासस
