काठमाडौं । नेप्से परिसूचक सामान्य अंकले घटेर २ हजार ७६९.०९ बिन्दुमा बन्द भएको छ। अघिल्लो कारोबार दिनको तुलनामा नेप्से ३.०७ अंक अर्थात् ०.११ प्रतिशतले घटेको हो ।
कारोबार सुरु हुँदा उतार–चढाव देखिएको बजारमा मध्यान्हपछि केही सुधार आए पनि अन्त्यमा सूचक ऋणात्मक नै रह्यो। दिनभर नेप्से २ हजार ७४० देखि २ हजार ७८० बिन्दुको दायरामा कारोबार भएको थियो ।
आजको कारोबारमा कुल ३ करोड ६२ लाखभन्दा बढी कित्ता सेयर किनबेच हुँदा कारोबार रकम १६ अर्ब ३५ करोड रुपैयाँ नाघेको छ। बजारमा अधिकांश समय लगानीकर्ताहरू पर्ख र हेरको अवस्थामा देखिए, जसका कारण बजार ठूलो अंकले बढ्न सकेन ।
आजको कारोबारमा मूल्य बढ्ने कम्पनीको संख्या कम र घट्ने कम्पनीको संख्या बढी देखिएको छ। करिब १६५ कम्पनीको सेयर मूल्य घट्दा करिब ४४ कम्पनीको मूल्य मात्र बढेको छ भने केही कम्पनीको मूल्य स्थिर रह्यो ।
विश्लेषकहरूका अनुसार पछिल्ला दिनमा आएको निरन्तर उतार–चढाव, नीतिगत स्पष्टताको अभाव तथा लगानीकर्तामा देखिएको सतर्कताले बजार दबाबमा रहेको देखिन्छ। आगामी दिनमा नतिजा, मौद्रिक नीति तथा समग्र आर्थिक संकेतहरूले बजारको दिशा निर्धारण गर्ने उनीहरूको भनाइ छ ।
