काठमाडौं, २०८२ चैत २७ । वैदेशिक रोजगार ठगी सम्बन्धी मुद्दाको प्रक्रियामा सहजीकरण गरिदिने भन्दै सेवाग्राहीसँग घुस माग्दै आएको आरोपमा वैदेशिक रोजगार विभाग ताहाचल काठमाडौंका एक कर्मचारी रंगेहात पक्राउ परेका छन् ।
अख्तियार दुरुपयोग अनुसन्धान आयोग, टंगालबाट खटिएको टोलीले विभागको अनुसन्धान तथा मुद्दा शाखामा कार्यरत नायब सुब्बा हेम बहादुर मस्राङगीलाई घुस लिइरहेको अवस्थामा नियन्त्रणमा लिएको हो ।
आयोगका अनुसार मस्राङगीले वैदेशिक रोजगार ठगी सम्बन्धी मुद्दा मिलाइदिने र प्रक्रियामा सहजता गराइदिने बहानामा सेवाग्राहीसँग रकम माग गर्दै आएका थिए । सोही विषयमा परेको सूचना तथा उजुरीका आधारमा खटिएको टोलीले उनलाई सेवाग्राहीबाट रु. १५,००० घुस लिइसकेको अवस्थामा कार्यालय परिसरबाट पक्राउ गरेको जनाएको छ ।
पक्राउका क्रममा मस्राङगीको साथबाट उक्त घुस रकमसहित स्रोत नखुलेको रु. ७७,६०० समेत बरामद गरिएको छ । यसरी कुल रु. ९२,६०० नगद र तीन थान मोबाइल समेत बरामद भएको आयोगले जनाएको छ ।
अख्तियारका अनुसार घटनाबारे थप अनुसन्धान जारी रहेको छ । प्रारम्भिक अनुसन्धानबाट सेवाग्राहीलाई अनावश्यक दुःख हैरानी दिँदै व्यक्तिगत लाभ लिन खोजिएको देखिएको आयोगको भनाइ छ ।
वैदेशिक रोजगार जस्तो संवेदनशील क्षेत्रमा समेत कर्मचारीले घुस माग्ने प्रवृत्ति देखिनुले सेवाग्राहीको पहुँच र न्यायमा गम्भीर प्रश्न उठाएको छ । आयोगले यस्ता भ्रष्टाचारजन्य गतिविधिविरुद्ध निगरानी अझ कडा बनाउने जनाएको छ ।
