काठमाडौं । नेपालमा कोरोना भाइरस संक्रमितको संख्या १०९ पुगेको छ । शनिबार थप सात जनामा कोरोना भाइरस पुष्टि भएको हो ।
स्वास्थ्य तथा जनसंख्या मन्त्रालयका सहप्रवक्ता डा समिरकुमार अधिकारीका अनुसार राष्ट्रिय जनस्वास्थ्य प्रयोगशाला, काठमाडौं, कोशी अस्पताल विराटनगरको प्रयोगशालामा गरिएको परीक्षणमा नयाँ सात जनामा कोरोना पुष्टि भएको हो ।
उनीहरु उदयपुर, कपिलवस्तु र पर्साका हुन् । उदयपुर भुल्के निवासी १८, ४५ र ५६ वर्षीया महिला र कपिलवस्तुका १७ वर्षका एक, १८ वर्षका दुई पुरुषसँगै पर्साको छपकैयाका ६२ वर्षीय पुरुषमा कोरोना पोजिटिभ देखिएको हो ।
उनीहरुको स्वास्थ्य अवस्था सामान्य भएको र अहिले स्वास्थ्यकर्मीको निगरानीमा रहेको मन्त्रालयले विज्ञप्ति जारी गरी जनाएको छ ।
सरकारले भने पछिल्लो समय पीसीआर परीक्षणमै कन्जुस्याइँ गर्दै गएको छ ।
अहिलेसम्म पीसीआर परीक्षण मात्र १५ हजार ४९९ वटा मात्रै भएको छ । त्यस्तै आरडीटी ५४ हजार ५३१ वटा मात्रै भएको छ । आरडीटी विश्वासिलो नभएको भन्दै पीसीआर गर्न आग्रह समेत गरिएको छ ।
१५ हजार ६२४ जना क्वारेन्टाइनमा बसेका छन् भने १३५ जना आइसोलेसनमा बसेका छन् ।
३० जनालाई निको भएको भनिए पनि तीमध्ये ३ जनामा फेरि संक्रमण देखिएपछि अस्पतालमा भर्ना भएका छन् ।
