सुर्खेत । आजदेखि कालिकोटको रास्कोट नगरपालिकामा इलाका प्रशासन कार्यालय सञ्चालनमा आउने भएको छ । लामो समयको प्रतीक्षापछि रास्कोटवासीले घर नजिकै प्रशासनिक सेवा पाउने भएका छन् । इलाका प्रशासन कार्यालय सञ्चालनसंगै कालिकोटका चार स्थानीय तहका नागरिकले एक दिनको यात्रामा सदरमुकाम आएर नेपाली नागरिकताको प्रमाण पत्र र राष्ट्रिय परिचय पत्र बनाउनु पर्ने सास्ती अन्त्य हुनेछ ।
इलाका प्रशासनबाट रास्कोट नगरपालिका, सान्नि त्रिवेणी, पचालझरना र पलाता गाउँपालिकाका नागरिकलाई सेवा लिन सहज हुनेछ । कर्णालीका पूर्वमन्त्री तथा प्रतिनिधिसभा सदस्य महेन्द्रबहादुर शाहीले इलाका प्रशासन कार्यालय उद्घाटन गर्ने कार्यक्रम रहेको रास्कोट नगरपालिकाका नगर प्रमूख धर्मराज शाहीले बताए ।
इलाका प्रशासन कार्यालयका लागि कामु शाखा अधिकृत नवराज बमको नेतृत्वमा कर्मचारीहरु खटिएको कालीकोटका प्रजिअ गोकर्णराज सुयलले बताए । ‘आजदेखि रास्कोटबाट सेवा सुरु गर्दैछौं,’ उनले भने, ‘रास्कोट आसपासका बासिन्दालाई सहज हुनेछ ।’ रास्कोटमा इलाका प्रशासन संचालन भएपछि चार पालिकाका ५० हजार बासिन्दालाई सहज हुने सहायक प्रजिअ जनक शर्माले बताए ।
