काभ्रे । काभ्रेको पाँचखाल नगरपालिकाका एक किसानले उत्पादन गरेको तरकारी लामो समयसम्म नबिकेपछि तरकारीमाथि ट्याक्टर लगाएका छन् ।
लाखौं खर्च गरेर उत्पादन गरेको काउली बजारमा तीन रुपैयाँमा पनि नबिकेपछि वडा नम्बर ७ का किसान धननाथ ढुंगानाले काउलीमाथि ट्याक्टर चलाएका हुन् ।
किसानहरुले उत्पादन गरेको तरकारी बारीमै कुहिए पनि अझैसम्म स्थानीय सरकारको ध्यान नगएको किसानहरु बताउँछन् ।
भारतबाट आएको तरकारीले भनेजस्तो भाउ पाउदा आफूहरुले उत्पादन गरेको तरकारी बिक्री गर्नको लागि तीनै तहको सरकारले कुनै पनि पहल नगरेको किसानहरुको गुनासाे छ ।
श्रीकृष्ण धिमालले आफ्नो सामाजिक सञ्जाल (फेसबुक) मा भिडियो पोस्ट गर्दै सरकारहरुले पाँचखालका किसानहरुको रगत पिइरहेको भनेर आक्राेश पाेखेका छन् ।
उनले लेखेका छन्,'गुहार गुहार…. पाँचखाल नगर माफियाका लागि शहर तिनै तहका सरकारहरुले पाँचखालका किसानहरुको रगत पि रहेको छ ।
पाँचखालका किसानलाई न्याय देउ, बजार देउ ।
बजारमा भारतीय काउली, पाँचखालका किसानको काउली प्रतिकिलो ३ रुपैयाँ किलोमा बिकेन , लाखौ खर्च गरेर उत्पादन गरेको काउली बजार लैजान नपाएपछि पाँचखाल नगरपालिका वडा नम्बर ७ का किसान धननाथ ढुंगानाले काउली माथि ट्याक्टर चलाउनु भएको छ।
यो राज्यका तिनै तहका सरकारहरु किसानहरुका लागि मरिसकेका छन् । (त्यसको प्रमाण फाेटाे हेराैं…')
उक्त भिडियोले काभ्रेमा कृषि क्रान्ति गर्छु भन्दै तीन हात उफ्रिने जनप्रतिनिधिदेखि सिंहदरबारलाई समेत गिज्याएको छ ।
