मुम्बई, १० पुस । बलिउडका दुई सुपरस्टार शाहरुख खान र सलमान खानको फिल्म सधै चर्चामा रहन्छ । उनका फिल्मले पनि बक्स अफिसमा राम्रो कमाइ गर्छन् । शाहरुख खान र सलमान खानको फिल्मले कमाइको हिसाबले बक्स अफिसमा धेरै रेकर्ड बनाएका छन् ।

तर अहिले अल्लु अर्जुनको फिल्म ‘पुष्पाः २’ ले अहिले बक्स अफिसमा यस्तो कीर्तिमान बनाएको छ, जसबाट दुवै खानका फिल्महरु पछाडि परेका छन् । हो, पुष्पा २ ले हिन्दीमा राम्रो कमाइ गरेको छ । 

‘पुष्पा २’ हिन्दी भाषामा सबैभन्दा धेरै कमाउने फिल्म बनेको छ । अल्लु अर्जुन र रश्मिका मन्डनाको यो फिल्मले हिन्दी भाषामा ७०० करोडभन्दा बढी कमाइसकेको छ । यति मात्र होइन, अल्लु अर्जुन, रश्मिका मन्डन्ना र फहद फासिल अभिनीत यो फिल्म २०२४ को दोस्रो सबैभन्दा धेरै कमाउने फिल्म बन्नबाट केही कदम मात्र टाढा छ । 

बितेका १९ दिनमा ‘पुष्पा २ः द रुल’ले हिन्दी भाषामा ७०४.२५ करोड कमाएको छ । बाहुबली : २ (हिन्दी), जवान, गदरः २ र एनिमल जस्ता ठूला फिल्महरूलाई पछि पार्दै यसले हिन्दी भाषामा सबैभन्दा ३ हप्तामा धेरै कमाइ गरिसकेको छ ।

निर्माताले पुष्पा : २ को हिन्दी संस्करणमा करिब २०० करोड रुपैयाँ खर्च गरेका छन् । १९ दिनपछि लगानीकर्ताले ५०४.२५ करोड रुपैयाँ नाफा पाएका छन् । यसैबीच, क्रिसमस र नयाँ वर्षको बिदामा पनि पुष्पा : २ ले राम्रो आम्दानी गर्न सक्ने धेरै ट्रेड विश्लेषकको विश्वास छ ।