नेपालको राजनीतिक दृश्य अहिले एउटा नयाँ तर, फ्लप फिल्मको कथा जस्तै अवस्था छ। धेरै नयाँ दलहरू राजनीतिक आकाशमा चम्किन आएको छन्, तर तिनीहरूको आकर्षण चाँडै नै विकर्षणमा बदलिन्छ ।
शुरूमा ठूलो चर्चा र हर्षोउल्लास, तर जब वास्तविकता सामु आउँछ, तब तिनीहरू सुस्ताउँछन् । नयाँ सिनेमा जस्तै दलहरू जसले प्रारम्भमा धेरै आशा जगाउँछन्, तिनीहरूको प्रभाव चाँडै समाप्त हुन्छ र अन्ततः पुराना दलहरू झै जालोमा फस्दछन्।
यसको मुख्य कारण भनेको सत्ताकाे लाेलुपता र प्राप्तिमा होडबाजी हो । सत्तामा जानका लागि दलहरूको बिचमा कुनै स्थायी नीति र धारणा छैन । अहिलेका दलहरू निरन्तर अस्थिरता र गैरजिम्मेवारीमा बाँचिरहेका छन् ।
यद्यपि नयाँ दलहरूको उदीयमानले केही आशा जगाउँछ, तर पुराना दलहरूको सांगठनिक शक्ति र अनुभवले तिनीहरूलाई पन्छाउन नयाँ दलहरूलाई कठिन बनाउँछ।
धेरैजसो राजनीतिक दलहरू देश र जनहितमा भन्दा पनि व्यक्तिगत स्वार्थका लागि एकदमै छलकपटमा चलिरहेका छन् । त्यस कारण आम जनताले पनि तिनका नेता र दलहरूलाई विश्वास गर्न अब कठिन मान्न थालेका छन् ।
आजको समयमा, सच्चा परिवर्तन ल्याउने र जनताको मायाँ पाउने क्षमता भएका इमानदारहरू सहभागी भएका कुनै नयाँ दल जन्मिएको छैन । गलत निर्वाचन प्रणालीले सिर्जना गरेकाे अस्थिर राजनीतिमा पुराना दलहरूको मात्र खरिद विक्रीकाे कुचक्र चलिरहेको पाइन्छ।
यसैले, नेपाली राजनीतिक प्रणालीलाई सुरक्षित राख्ने हाे भने, अबको जनताकाे आवश्यकता अनुसार, संविधान संशाेधनबाट स्थायी र दीर्घकालीन दृष्टिकोण र रणनीतिमा आधारित नयाँ दलहरूको विकास गर्नु हो ।
यद्यपि यहाँको राजनीतिक वातावरण परिवर्तनशील र चुनौतीपूर्ण छ, तर दुर्भाग्यकाे कुरा पुरानो दलहरूको विकल्प बन्ने र राष्ट्र र जनहितमा समर्पित भएर जनसेवक बन्ने उद्देश्य लिएर कुनै नयाँ दल देख्न मुस्किल परिरहेछ ।
सिर्जनशील, देश र जनतामा समर्पित नेतृत्वको खोजीमा, हामी र हाम्राे पुस्तालाई आशा छ कि भविष्यमा कुनै दल अहिलेकाे राजनीतिक कुचक्रलाई तोड्न सफल हुनेछ।
प्रतिकृया दिनुहोस