काठमाडाैं । संस्कृति, पर्यटन तथा नागरिक उडड्यन मन्त्रीबाट प्रेम आलेको अवकाशसँग खुसीको सीमा नरहेका पात्र हुन्, नेपाल पर्यटन बोर्डका सीईओ धनञ्जय रेग्मी । मन्त्री आलेसँग झन्डै ९ महिना झगडा गरेर बसेका रेग्मी अहिले आफैं कर्मचारीमाथि तानाशाही शासन लाद्न थालेकाे गुनासाे सुनिएकाे छ । मातहतका कर्मचारीलाई सताउने, कारबाही, सरुवाको धम्की दिनेदेखि बढुवामा रोकिदिनेसम्मको धम्की दिइरहेका छन् ।
सामान्य अवस्थामा झन्डै साँढे एक बर्ष जागिरकाे समय बाँकी रहेका बोर्डका सीईओ रेग्मीले अहिले ६ जना कर्मचारीलाई कारबारहीको तयारी गरेकाे छन् । ती ६ जना नै अधिकृत तहका कर्मचारीहरु हुन् ।
विगत केही महिनादेखि रेग्मीको बेथिति र अनुशासनहीन काम कारवाहीप्रति चर्को विरोधमा रहेका ती कर्मचारीमाथि कारबाहीकौ मौका खोजिरहेका रेग्मीले २०७९ साउन २ गते एउटा बहाना पाएका थिए ।
त्यसदिन ती ६ जना कर्मचारी आफ्नो समस्या बोकेर नवनियुक्त पर्यटनमन्त्री जीवनराम श्रेष्ठलाई भेट्न गएका थिए । आफूहरुको बढुवा १५ बर्षदेखि नभएको भन्दै रुष्ट रहेका उनीहरुले सीईओ रेग्मीमाथि अनेक आलोचना पनि गर्दै आएका थिए । त्यही आलोचना बोकेर मन्त्री श्रेष्ठसम्म पुुगेका आशंकामा कारबाहीको छुरा चलेको टिप्पणी भइरहेको छ ।
सीर्ईओ रेग्मीबाट अपेक्षित सहयोग नपाएपछि उनीहरु ट्रेड युनियन खोल्न पनि लागेका थिए । एमालेसमर्थित ट्रेड युनियन श्रम विभागमा दर्ता प्रक्रियामा पुगेको छ । आफूहरुको माग पूरा नहुने देखेपछि ती कर्मचारीले ट्रेड युनियन खोल्न थालेको पनि बताइएको छ । एकातिर ट्रेड युनियन खोल्ने अर्कोतिर सीईओका विरुद्धमा लाग्ने भएपछि रेग्मी कारबाहीमा ओर्लिएको बोर्डमा चर्चा हुने गरेको छ ।
उनीहरुमध्ये अधिकांश पहिला रेग्मीकै पक्षमा रहेका थिए । रेग्मीलाई सीईओ बनाउनुपर्छ भनेर लविङ गर्नेमध्ये कै थिए, कुन्दन शर्मा मिश्र । तर, अहिले उनी पनि कारबाहीको पहिलो नम्बरमा परेका छन् । त्यसैगरी, सुधन सुवेदी, सागर श्रेष्ठ, सन्तोष थापा, जानकी प्रसाद उपाध्याय र गोकुल भण्डारी रहेका छन् ।
उनीहरु सबै वरिष्ठ अधिकृत हुन् । उनीहरुले विगत १५ बर्षदेखि बढुवा नभएको भन्दै गुनासो गर्दै आएका छन् । उनीहरुलाई बढुवा गर्न केही महिना पहिला प्रयास पनि भएको थियो । तर, उक्त प्रयासको समयमा पनि रेग्मीसँग उनीहरुको ठाकठूक परेपछि समस्या भएको बताइएको छ ।
२०७९ साउन २ गतेदेखि अहिलेसम्म दुुईचोटी पत्र काटिसकेका छन् । तर, कारबाही के गर्ने हुन भन्ने चाहिं खुलिसकेको छैन । उनीहरुलाई थप स्पष्टीकरण सोधेर सरुवा गर्ने वा के गर्ने भन्ने चाहिँ प्रष्ट नभएको बताइएको छ । बढुवा नभएको पीडामा रहेका कर्मचारीलाई थप आतंकित बनाएर बोर्डमा रेग्मीले कर्मचारी तर्साउन थालेको भन्दै उनीमाथि पनि टिप्पणी हुन थालेको छ ।
प्रतिकृया दिनुहोस