कास्की/तनहुँ, चैत्र २३ –। कास्कीको अन्नपूर्ण गाउँपालिका–११ देउरालीस्थित चुम्रुङ क्षेत्रमा हिमपहिरोमा परेर बेपत्ता भएका चिनिया नागरिकको शव १२ दिनपछि फेला परेको छ।

सशस्त्र प्रहरी बल नेपाल नं. २४ कालिका गण कास्कीबाट खटिएको विपद् व्यवस्थापनसहितको टोलीले चैत्र २३ गते दिउँसो १२:३० बजे शव फेला पारेको हो।

बेपत्ता नागरिकको पहिचान २८ वर्षीय चिनिया नागरिक ई चेङ्गयुङको रूपमा खुलेको छ। उनी अन्नपूर्ण बेसक्याम्पबाट घान्द्रुकतर्फ जाँदै गर्दा चैत्र ११ गते चुम्रुङ क्षेत्रमा हिमपहिरोमा परेर सम्पर्कविहीन भएका थिए।

मर्स्याङ्दीमा डुबेर बेपत्ता युवकको खोजी जारी

यसैबीच, तनहुँ जिल्लाको आबुखैरेनी गाउँपालिका–१, बरादीस्थित मर्स्याङ्दी नदीमा एक युवक बेपत्ता भएका छन्। शुक्लागण्डकी नगरपालिका–५ निवासी अन्दाजी २० वर्षीय आशिष राना नदीमा पौडी खेल्ने क्रममा चैत्र २२ गते डुबेर बेपत्ता भएको बताइएको छ।

उनको खोजीका लागि सशस्त्र प्रहरी बल नेपाल विपद् व्यवस्थापन तालिम शिक्षालय कुरिनटारबाट तालिमप्राप्त गोताखोर टोली परिचालित गरिएको छ।
साथै, सशस्त्र प्रहरी बल नं. २३ मनकामना गण तनहुँबाट पनि थप टोली परिचालन गरिएको छ।

सुरक्षाबलले उद्धार कार्यलाई तीव्र बनाउँदै सम्भावित स्थानहरूमा खोजी जारी राखेको जानकारी दिएको छ।