काठमाडाैं । मध्य पश्चिम पृतनाको जिम्मेवारी क्षेत्र अन्तर्गतका जिल्लाहरूमा रहेका विभिन्न सञ्चार माध्यमहरूमा आबद्ध १९ जना सञ्चारकर्मीहरूको सहभागितामा रक्षा संवाददाता अभिमुखीकरण कार्यक्रम (Defence Correspondent Orientation Programme, DCOP) २०८१ फाल्गुण २५ गते मध्य पश्चिम पृतना हेडक्वार्टर बुटवलमा सुरु भएको छ।
कार्यक्रमको उद्घाटन गर्दै मध्य पश्चिम पृतनाका पृतनापति उपरथी प्रेम बहादुर पुनले सहभागी सञ्चारकर्मीहरूलाई स्वागत गर्दै कार्यक्रम सफलताको शुभकामना व्यक्त गरे। उनले सञ्चारकर्मीहरूलाई नेपाली सेनाको कार्य प्रणाली, जिम्मेवारी र गतिविधिहरूको बारेमा सही तथा विस्तृत जानकारी प्रदान गर्न अभिमुखीकरण कार्यक्रम महत्त्वपूर्ण हुने बताए।
चार दिनसम्म सञ्चालन हुने यस अभिमुखीकरण कार्यक्रममा नेपाली सेनाको सङ्गठनात्मक स्वरूप, जिम्मेवारी तथा भूमिका, रक्षा क्षेत्रका मुख्य मुद्दाहरू, सेना सञ्चार रणनीति तथा वर्तमान परिप्रेक्ष्यमा सेनाको गतिविधिहरूका बारेमा जानकारीमूलक प्रस्तुतीकरण तथा अन्तरक्रिया गरिनेछ।
कार्यक्रममा विभिन्न सैन्य अधिकारीहरू, रक्षा विश्लेषकहरू तथा सञ्चारकर्मीहरूबीच परस्पर ज्ञान आदान-प्रदान हुने अवसर मिल्ने अपेक्षा गरिएको छ। सहभागी सञ्चारकर्मीहरूले नेपाली सेनासँगको सम्बन्धलाई अझ दृढ बनाउँदै आम जनतालाई सही सूचना प्रवाह गर्न मद्दत गर्ने विश्वास व्यक्त गरेका छन्।
नेपाली सेनाले सञ्चार माध्यमहरूसँग सहकार्य गर्दै विश्वसनीय समाचार सम्प्रेषणलाई प्रवर्द्धन गर्ने उद्देश्यले यस्ता कार्यक्रमहरू आयोजना गर्दै आएको छ। सेनाले सञ्चारकर्मीहरूसँग प्रत्यक्ष संवाद तथा जानकारी आदान-प्रदान गर्न पाउने अवसरका रूपमा यस कार्यक्रमलाई लिएको छ।
चार दिनसम्म चल्ने यस अभिमुखीकरण कार्यक्रममा सहभागि सञ्चारकर्मीहरूलाई सैनिक अभ्यास स्थलहरू अवलोकन गराउने, सेनाका विभिन्न शाखाहरूको कार्यप्रणालीबारे जानकारी गराउने तथा प्रत्यक्ष अनुभव आदान-प्रदान गराउने कार्यक्रमहरू पनि समावेश गरिएका छन्।
कार्यक्रमको समापन मिति २०८१ फाल्गुण २८ गते हुनेछ, जसमा सहभागी सञ्चारकर्मीहरूलाई प्रमाणपत्र वितरण गरिनेछ।
प्रतिकृया दिनुहोस