कमठमाडाैं, स्वयम्भु, माघ ९ गते। सशस्त्र प्रहरी बल नेपाल (एपीएफ) को २४औं वार्षिकोत्सवका अवसरमा सशस्त्र प्रहरी महानिरीक्षक राजु अर्यालले एक भावपूर्ण धन्यवाद ज्ञापन गर्दै संगठनका अग्रजहरूको त्याग, बलिदान र समर्पणलाई उच्च सम्मान प्रदान गरे। उनले संस्थापक सशस्त्र प्रहरी महानिरीक्षक स्व. कृष्णमोहन श्रेष्ठ लगायत सम्पूर्ण अमर सशस्त्र प्रहरीलाई श्रद्धाञ्जली अर्पण गरे, जसले कर्तव्यको बलिवेदीमा आफ्नो प्राण आहुति दिएका थिए ।

सशस्त्र प्रहरी बलको २५ वर्षको यात्रा र भविष्यका योजना

महानिरीक्षक अर्यालले सशस्त्र प्रहरी बलको २५ वर्षको यात्रा र संगठनले प्रस्तुत गरेको उच्च साहस र वीरता रेखांकित गर्दै भविष्यमा पनि "समृद्ध नेपाल, सुखी नेपाली" को लक्ष्य प्राप्तिमा संगठनले योगदान पुर्याउने प्रतिबद्धता जनाए।

सशस्त्र प्रहरी महानिरीक्षक अर्यालले सशस्त्र प्रहरी बलको भूमिका राष्ट्रिय जीवनका विविध घटनाक्रम र चुनौतीहरूको सामना गर्न, सीमामा सुरक्षा प्रदान गर्न, विपत् व्यवस्थापन र नागरिक उद्धारमा महत्त्वपूर्ण रहेको बताए । "तराईको केचनाकवलदेखि सगरमाथाको हिमालसम्म सशस्त्र प्रहरी बलको उपस्थितीले सुरक्षा र उद्धार कार्यमा महत्वपूर्ण भूमिका खेलिरहेको छ," उनले थपे।

सशस्त्र प्रहरीको सेवा भाव र सामाजिक कार्यहरू

महानिरीक्षक अर्यालले सशस्त्र प्रहरी बलका जवानहरू जागिर मात्र होइन, सेवा गर्न प्रतिबद्ध रहेको उल्लेख गर्दै सीमावासीसँग रचनात्मक र भावनात्मक सम्वन्ध राख्ने प्रयास जारी राखेको बताए। ६१ वटा स्वास्थ्य शिविर, ७२७ जनालाई विपत् स्वयंसेवक तालिम, ५१४ जनालाई सीपमूलक तालिम र ५३ वटा शीघ्र असर आयोजना गरेका कार्यक्रमहरूको विवरण पनि उनले प्रस्तुत गरे।

लागूऔषध र सीमा सुरक्षा: जनचेतना अभियान

नेपालमा लागूऔषधको बढ्दो समस्या र यसको सीमा क्षेत्रमा बढी प्रयोगलाई ध्यानमा राख्दै, महानिरीक्षक अर्यालले "नशारहित युवा, सुरक्षित सीमा, समृद्ध राष्ट्र" भन्ने नारासहित जनचेतनामूलक कार्यक्रमहरू सञ्चालन गर्ने कुरा उल्लेख गरे। विद्यालयहरूमा सचेतनामूलक कक्षाहरू, सडक नाटक, निबन्ध, कविता र वक्तृत्वकला प्रतियोगिता सञ्चालन गरेर, लागूऔषध विषयमा जनजागरण गर्ने प्रयासलाई बल दिइएको बताए ।

सुरक्षा समन्वय र सामूहिक प्रयास

राज्य र नागरिकको सुरक्षा कुनै एकल संस्थाको प्रयासबाट मात्र सम्भव नहुने उल्लेख गर्दै, महानिरीक्षक अर्यालले अन्य सुरक्षा निकायसँगको निकट समन्वयलाई महत्त्वपूर्ण ठान्दा सशस्त्र प्रहरी बल नेपालले समर्पण र निष्ठाका साथ आफ्ना कार्यहरूलाई पूरा गरिरहेको विश्वास व्यक्त गरे।

महानिरीक्षक अर्यालले अन्तमा सशस्त्र प्रहरी बलका जवानहरूको समर्पण र कर्तव्यप्रतिको प्रतिबद्धतालाई पुनः पुष्टि गर्दै, संगठनलाई अझ प्रभावकारी बनाउन प्रयास जारी रहने बताएका छन्।