बिराटनगर ।  नेकपा (माओवादी केन्द्र) का अध्यक्ष पुष्पकमल दाहाल  (प्रचण्ड) ले राजवंशी समुदायको परिकार भक्काको स्वाद लिएका छन् ।

मोरङको बिराटनगर पुगेका प्रचण्डले आज शनिबार बिहान मर्निङ वाक गर्ने क्रममा एक महिलाले भक्का बनाउँदै गरेको अवस्थामा पुगेर खाएका हुन् ।

तातो भक्का खाँदै उनले यो निकै स्वादिलो रहेको प्रतीक्रिया दिएका छन् ।उनको साथमा नेकपा (माओवादी केन्द्र) का नेता तथा कार्यकर्ता पनि थिए । राजवंशी समुदायको परिकार भक्काको स्वाद लिएको तस्विर अध्यक्ष प्रचण्डले सामाजिक संजाल फेसबुक मार्फत पोस्ट गरेका छन् । शनिबार दिनभरजसो मोरङका जनसमुदायसँगको साक्षात्कारमा रहने समेत उनले जानकारी दिएका छन् ।

मोरङको बस्तीमा अहिले सानो माटाको हण्डीमा पानी उमालेर बाफमा बिहान झिसमिसेदेखि नै सडक किनारमा बसेर भक्का पकाउने र बेच्ने गर्छन् । यो परिकार पुस–माघको चिसो मौसममा हुरहुरी बाफ उड्ने गरि तातो खाजाका रुपमा भक्का राजवंशी समुदायका महिलाले बनाउने गर्दछन् । 

भक्का बनाउन धानको चामललाई पीठो बनाएर बटुकामा राखेर बाफमा केहीबेर पकाइन्छ । यो प्रायः चिया र अचारसँग खाने गरिन्छ । भाक्का पोसिलो, दिलो र आडिलो हुने भएकाले जनमानसमा लोकप्रिय बनिसकेको छ । झापा र मोरङका आदिवासी राजवंशी समुदायमा ‘भक्का’ खाने चलन धेरै पुरानो मानिन्छ ।