काठमाडौँ । अष्ट्रिया पठाइदिन्छु भन्दै रकम ठगी गरेको आरोपमा प्रहरीले एक जनालाई पक्राउ गरेको छ । पक्राउ पर्नेमा कंचनपुर जिल्लाको भिमदत्त नगरपालिका वडा नं. १ घर भई हाल काठमाडौँको टोखा नगरपालिका वडा नं. १० भण्डारी टोल बस्ने राम बहादुर सिंह रहेका छन् । 

सिंहले पीडित हरिश प्रसाद जोशीलाई वैदेशिक रोजगारीको लागि अष्ट्रिया पठाइदिन्छु, मासिक रु. १ लाख ५० हजार तलव हुन्छ भनि विश्वास दिलाई प्रलोभनमा पारी निज पीडितबाट पटक-पटक गरी ३ लाख रुपैयाँ लिई सम्पर्क विहीन भएका थिए ।

निज राम बहादुर सिंहको खोजतलास गर्ने क्रममा काठमाण्डौं उपत्यका अपराध अनुसन्धान कार्यालयबाट खटिएको प्रहरी टोलीले  मिति २०८०।०९।१६ गते काठमाडौँको टोखा नगरपालिका वडा नं. १० भण्डारी टोलबाट पक्राउ गरेको हो ।

 यसबारे थप अनुसन्धान तथा कारवाहीको लागि निज राम बहादुर सिंहलाई वैदेशिक रोजगार विभाग ताहाचल पठाइएको काठमाण्डौं उपत्यका अपराध अनुसन्धान कार्यालय मिनभवन, काठमाण्डौंले जानकारी दिएको छ ।