• बुधबार-मङ्सिर-१०-२०७७

सरकारले विकास गरेको छ, भ्रष्टाचार बढ्यो भन्नु निराधार : भीम रावल

 
डोटी  । नेपाल कम्युनिष्ट पार्टी (नेकपा) का नेता डा भीम रावलले नेपाल कम्युनिष्ट पार्टी (नेकपा) कुनै पनि हालतमा नफुट्ने, बरु एकजुट भएर जाने बताएक छन् । 


जिल्लाको पूर्वीचौकी गाउँपालिका–२ बग्लेकमा कार्यकर्तासँगको भेटघाटमा पूर्वउपप्रधानमन्त्री डा रावलले पार्टीमा पछिल्लो समय आन्तरिक विवाद भए पनि पार्टी कुनै पनि हालतमा नफुट्ने बरु एकजुट भएर जाने बताए । उनले भने, “पार्टीमा विवाद छ तर फुट्ने कुरा छैन, विवाद समाधान गरेर पार्टी मजबुत भएर जानेछ ।”


नेता डा रावलले यही १३ गते बोलाइएको सचिवालय र स्थायी कमिटी बैठकसँगै केन्द्रीय कमिटीको बैठकमा विवाद हुने अवस्था देखिए पनि सबै समस्या तथा मनमुटाव समाधान हुने दाबीसमेत गरे । उनले अगाडि थपे, “नेकपा ठूलो पार्टी हो, ठूलो ठाउँमा विवाद भइहाल्छ, तर पार्टी नै फुटिहाल्छ भन्ने अवस्था छैन ।” 


नेता रावलले नेकपाका सबै नेता लोकतन्त्रमा विश्वास राख्ने भएका कारण पार्टी कमिटीले गरेको निर्णय दुवै अध्यक्षले अनिर्वाय मान्नुपर्ने तथा मान्दिनँ भन्न कसैलाई छुट नभएको बताए । जनमतको कदर गर्नकै लागि भए पनि पार्टी हमेशा एकढिक्का भएर जानेसमेत उनले जानकारी दिए । 

 

नेता रावलले नेकपा भ्रष्टाचार विरोधी पार्टी भएकाले पार्टीमा भ्रष्टाचार गर्ने जोकोहीलाई पनि कारवाही हुने बताए ।


फरक प्रसंगमा उनले  नेकपा सरकारको पालामा भ्रष्टाचार बढ्यो भन्ने प्रतिपक्षको आरोप निराधार भएको बताए ।  नेकपा सरकारले तीव्र विकास गरेपछि प्रतिपक्षीले यस्तो आरोप लगाएके उनको भनाइ छ । 


“हामी नागरिकको रक्षा र देशको विकासका लागि सरकारमा गएका हौँ”, उनले भने, “नेकपाको सरकारको पालामा विकासका गतिले तीव्रता पाएपछि प्रतिपक्षले भ्रष्टाचार गर्यो भन्ने आरोप लगाएका हुन्, जुन आरोप निराधार छन् ।”
 

प्रतिकृया दिनुहोस